Zbulohet çmimi i Ademola Lookman, klubet e Premierligës të interesuara për yllin e Atalantës
Heroi i Atalantës në Ligë të Evropës, Ademola Lookman, mund të kushtojë rreth 35 milionë euro në afatin kalimtar veror, me shumë klube të Premierligës të interesuara për shërbimet e tij.
Lookman shënoi një het-trik të shkëlqyer për Atalantën në finalen e Ligës së Evropës, teksa mundi Bayer Leverkusenin e pamposhtur 3:0 në një paraqitje mahnitëse. Anësori, i cili më parë ka luajtur për Everton, Fulham dhe Leicester City, po tërheq interes nga një numër klubesh angleze, sipas The Times.
Lookman mund të kushtojë deri në 35 milionë euro, që do të shënonte një fitim të konsiderueshëm për klubin e Serisë A, i cili pagoi afër 9 milionë euro për ta nënshkruar atë nga RB Leipzig. Anësori ka shpërthyer në Itali dhe ka shënuar 15 gola në sezonin 2023-24, ndërsa ka dhënë edhe tetë asistime.
Lookman ishte i huazuar te Leicester nga RB Leipzig dhe klubi kishte mundësinë ta nënshkruante atë përgjithmonë për 17 milionë euro në fund të periudhës së tij të përkohshme, por vendosi të mos paguante klauzolën. Në 42 ndeshje për Foxes, ai shënoi tetë gola dhe regjistroi pesë asistime.
Lookman mund të jetë në qendër të një lufte ofertash këtë verë, por ende nuk ka asnjë të dhënë se cilat klube po qarkullojnë. Atalanta mund të jetë në gjendje të sjellë një fitim të konsiderueshëm nga anësori këtë verë.
