Xavi e quan padrejtësi që Busquets nuk u emërua asnjëherë për Topin e Artë
Trajneri i Barcelonës, Xavi Hernandez, tha se është padrejtësi e madhe që Sergio Busquets nuk ishte kurrë kandidatë për Topin e Artë, me mesfushorin spanjoll që bëri të ditur largimin nga katalunasit javën e kaluar, pas shumë viteve qëndrim në Camp Nou.
Busquets, 34 vjeç, nuk do të rinovojë kontratën e tij me Barçën kur skadon në fund të sezonit, duke i dhënë fund 18 viteve në Spotify Camp Nou, kohë gjatë së cilës ai ka bërë mbi 700 paraqitje. Vetëm Lionel Messi dhe Xavi kanë bërë më shumë.
Shumë nga ato ndeshje erdhën si pjesë e një mesfushe me tre lojtarë së bashku me Xavi dhe Andres Iniesta, të cilët të dy figuruan në mesin e kandidatëve për Topin e Artë gjatë karrierës së tyre, ndërsa Busquets është emëruar vetëm një herë, duke përfunduar i 20-ti në vitin 2012.
“Ai është diktuesi më i mirë i lojës, mesfushori i thellë, si të doni ta quani, që e kam parë me sytë e mi”, tha Xavi në një konferencë shtypi përpara ndeshjes të së dielës në La Liga kundër Espanyolit, kur Barça mund të shpallet kampion.
“Gjithmonë më është dukur një padrejtësi masive që ai nuk ishte kurrë në mesin e të emëruarve për Topin e Artë. Ka shumë padrejtësi në futboll dhe kjo ishte një prej tyre. Ai është ndoshta mesfushori më inteligjent me të cilin kam luajtur. Ai ka qenë 10 nga 10 në çdo pjesë të fushës dhe është organizuesi më i mirë i lojës në historinë e Barçës."
Xavi tha se ai e respekton dhe e kupton vendimin e Busquets për t'u larguar këtë verë, edhe pse ai shtoi se vendimi do të jetë "i dëmshëm" për ekipin, me ish- reprezentuesin spanjoll ende një titullar i rregullt. Busquets nuk është i vetmi person që largohet nga Barça në fund të sezonit.
ESPN raportoi se drejtori i futbollit Mateu Alemany gjithashtu do të largohet dhe ai ka qenë në negociata të avancuara për t'iu bashkuar skuadrës së Premierligës te Aston Villa.
"Ne po humbasim një aset të rëndësishëm," tha Xavi për Alemany. "Ai ka qenë një person kyç në ristrukturimin e klubit, së bashku me [drejtorin sportiv] Jordi [Cruyff]. Ka qenë kënaqësi të punoja me të dhe është një humbje e madhe."
Në fushë, Barça është dy pikë larg fitimit të titullit të parë të La Ligas që nga viti 2019. Fitorja në Espanyol të dielën do t'i bëjë ata të shpallen kampion, ndërsa ata mund të shpallen kampion edhe para ndeshjes, nëse Real Madrid dhe Atletico Madrid humbasin pikë.
"Për mua, gjëja e rëndësishme është fitimi i ligës," tha Xavi. “Nuk më intereson nëse është në Espanyol, Camp Nou, Real Madrid apo Getafe. Ajo që ne vlerësojmë është puna e bërë gjatë sezonit për të arritur këtë pozicion, jo një ndeshje derbi.
“Jam i sigurt se do të ishte një plus i madh për tifozët, por, për ne, është shumë e rëndësishme të fitojmë ligën. Unë jam i ‘dëshpëruar’ për ta fituar atë. Do të përfaqësonte një hap të madh përpara. Klubi po rindërtohet dhe fitimi i La Ligës, me Superkupën do të ishte masiv për mua dhe klubin."
Barça ka një skuadër të plotë për ndeshjen ndaj Espanyol, e cila është në fund të tabelës me tre pikë larg vendit të 17-të me vetëm pesë ndeshje për të përfunduar sezonin.
