VIDEO: Tjetër gabim i tmerrshëm nga kosovari Arijanet Muric, Burnley barazon me Brightonin
Nuk luajti për shumë ndeshje me radhë, por bëri debutim fantastik dhe vazhdoi me paraqitje të mira për Burnleyn. Por Arijanet Muric në dy ndeshjet e fundit ka bërë gabime të tmerrshme që i kanë kushtuar shumë skuadrës së tij, që po lufton për mbijetesë.
Pas një gabimi në xhiron e kaluar, kësaj radhe ai gaboi edhe më rëndë dhe ishte fajtori që skuadra e tij nuk mori tre pikët e plota në këtë takim.
Brownhill e dërgoi skuadrën e Vincient Kompanys në epërsi në minutën e 74-të dhe kur të gjithë po mendonin që Burnley do të merrte tre pikë shumë të rëndësishme, Aro Muric gaboi.
Një top i kthyer te portieri kosovar, me këtë të fundit që nuk arriti ta ndalë mirë edhe pse ishte duke shkuar shumë ngadalë, topi përfundoi në rrjetë, që u shënua si autogol i tij.
Arijanet Murić what a scandal! 1-1pic.twitter.com/srJ1gdOCip
— FootColic ⚽️ (@FootColic) April 13, 2024
Po të mos ishte për gabimin, Aro Muric me shumë mundësi do të ishte lojtari i ndeshjes, pasi pati ndeshje fantastike, madje bëri pritje edhe në minutat e fundit.
Kështu ndeshja përfundoi me barazim 1:1 dhe Burnley po rrezikon rënien nga elita angleze, vetëm një sezon pasi u promovua.