Top futbollisti iranian arrestohet para ndeshjes me Uellsin për “shpërndarje të propagandës”
Forcat e sigurisë iraniane kanë arrestuar gjatë të enjtes futbollistin më të njohur të këtij shteti, Voria Ghafouri, me akuzat që e rëndojnë atë për shpërndarje të propagandave kundër Republikës Islamike dhe për të minuar ekipin kombëtar që po paraqitet në Kupën e Botës.
Voria Ghafouri, dikur kapiten i klubit të Teheranit, Esteghlal, është shprehur hapur në mbrojtjen ndaj kurdëve iranianë, duke i thënë qeverisë në rrjetet sociale që të ndalojë vrasjen e kurdëve. Më parë ai ka qenë i arrestuar për kritika ndaj ish-ministrit të jashtëm iranian, Javad Zarif.
Irani do të luajë të premten me Uellsin në ndeshjen e dytë në Botërorin e Katarit. Skuadra iraniane tashmë është përfshirë në polemika pasi nuk kënduan himnin kombëtar para ndeshjes kundër Anglisë dhe arrestimi i Ghafourit ka të ngjarë të shihet si një paralajmërim për lojtarët që të mos përsërisin protestat e tyre.
Ai u arrestua pas një seance stërvitore me klubin e tij, Foolad Khuzestan, me akuzën se kishte "njollosur reputacionin e ekipit kombëtar dhe përhapur propagandë kundër shtetit", tha agjencia e lajmeve Fars.
Mediat e tjera thanë se ai po akuzohej për "fyerje dhe qëllim për të shkatërruar ekipin kombëtar të futbollit dhe duke folur kundër regjimit".
Futbollisti, 35 vjeç, ishte anëtar i skuadrës së Iranit për Kupën e Botës 2018, por çuditërisht nuk u emërua në formacionin përfundimtar për Kupën e Botës të këtij viti në Katar.
Me origjinë nga qyteti i populluar nga kurdët, Sanandaj, në Iranin perëndimor, Ghafouri kishte postuar një foto në Instagram të tij me veshje tradicionale kurde në malet e Kurdistanit. Sanandaj ka duruar disa nga goditjet më të dhunshme në protestat që pasuan vdekjen në paraburgim të Mahsa Amini, një kurde iraniane 22-vjeçare, dhe Ghafouri kishte vizituar disa nga të plagosurit në protestat në Mahabad.
Në vitin 2019, ai shpërndau fanella blu për nder të Sahar Khodayari, një grua që u vetëdogj pasi u dënua me burg për tentativë për të parë një ndeshje të Esteghlal në stadiumin Azadi. Pas një tjetër incidenti dhune ndaj tifozëve gra të futbollit në vitin 2021, Ghafouri shkroi në Instagram: “Si një futbollist, me të vërtetë jam poshtëruar kur luaj në një epokë kur nënave dhe motrave tona u ndalohet hyrja në stadiume”.
Shumë tifozë sugjeruan se karriera e tij në Esteghlal, një ekip fitues i kampionatit, u ndërpre në qershor si ndëshkim që foli hapur. Të tjerë argumentuan se në mesin e të 30-ave, Ghafouri ishte shumë i vjetër për liderin iranian.
Së fundmi ai shkroi në Twitter: “Ndaloni të vrisni popullin kurd!!! Kurdët janë vetë Irani… Vrasja e kurdëve është e barabartë me vrasjen e Iranit. Nëse jeni indiferent ndaj vrasjes së njerëzve, ju nuk jeni iranian dhe nuk jeni as qenie njerëzore… Të gjitha fiset janë nga Irani. Mos vrisni njerëz!!!”
