Ten Hag e justifikon formën e dobët të Antony: Problemet jashtë fushës ndikuan në paraqitjet e tij
Anësori brazilian i Manchester United, Antony, ka qenë i ndikuar nga problemet jashtë fushës prandaj nuk është paraqitur në mënyrën më të mirë, ka thënë trajneri i Djajve të Kuq, Erik ten Hag.
Braziliani ka qenë subjekt i një hetimi policor pas akuzave për abuzim kundër tij nga tre gra, megjithëse ai nuk është arrestuar apo akuzuar as në Brazil dhe as në Mbretërinë e Bashkuar dhe i mohon akuzat.
23-vjeçari nuk ka asnjë gol apo asist në 21 paraqitje këtë sezon.
"Unë mendoj se problemet e tij jashtë fushës e ndalojnë atë të luajë," tha Ten Hag. "Ato probleme kanë pasur ndikim tek ai, patjetër, kështu që ai duhet të merret me këtë. Pra, ai i shkaktoi, kështu që ai duhet t'i zgjidhë ato. Ne do t'i japim të gjithë mbështetjen, por ai duhet të bëjë më mirë."
Antony u bë nënshkrimi i dytë më i shtrenjtë i Manchester United kur u bashkua nga Ajax për 82 milionë funte në shtator 2022, pasi kishte shënuar 24 gola dhe kishte dhënë 22 asistime në 82 paraqitje për gjigantët holandez.
Ai shënoi 10 gola dhe kontribuoi me pesë asistime në 47 paraqitje për Djajtë e Kuq gjatë 2022-2023 dhe filloi katër ndeshjet e para të këtij sezoni.
Gjatë pushimit ndërkombëtar në shtator, gazeta braziliane e lajmeve UOL publikoi pretendimet e bëra nga ish-partnerja e Antony, Gabriela Cavallin, të cilat Antony i mohon.
Akuza të tjera për sulme pasuan kur Rayssa de Freitas dhe Ingrid Lana pretenduan secila se nga Antony ishin sulmuar në vitin 2022, gjë që ai e mohon.
United u përgjigj duke thënë se ata i marrin akuzat "seriozisht" dhe i dhanë Antonyt leje me pagesë të plotë për t'u marrë me akuzat më 10 shtator.
Ai rifilloi stërvitjen nga 29 shtatori pasi foli vullnetarisht me Policinë e Manchesterit dhe u kthye në aksion në fillim të tetorit.
“Vitin e parë ai ishte mirë, në para-sezon ishte shumë mirë, katër ndeshjet e para [të këtij sezoni] ishte shumë i mirë”, shtoi Ten Hag. “Por që nga momenti kur ai ishte jashtë dhe më pas u kthye, ai nuk dha performancën që duhet të prisnim prej tij dhe ai mund të bëjë shumë më mirë. Produkti i tij përfundimtar në Ajax ishte shumë i lartë dhe ai mund të kthehez në atë nivel. Premierliga është më e vështirë, por ai është i aftë ta bëjë këtë."
