Szczesny kthehet nga pensionimi, Barcelona nënshkruan me ish-portierin e Arsenalit e Juventusit
Barcelona ka konfirmuar se portieri Wojciech Szczesny ka nënshkruar për katalunasit, pasi Marc-Andre ter Stegen pësoi lëndim dhe do të mungojë gjatë tërë sezonit.
Szczesny u pensionua në verë, por është tërhequr nga pensioni dhe do të kalojë pjesën tjetër të sezonit 2024-25 me Barcelonën. Gjigantët katalanas kanë njoftuar se ish-ylli polak ka nënshkruar për klubin deri në qershor të vitit 2025 pasi Marc-Andre ter Stegen do të mungojë për krejt sezonin pas një dëmtimi të rëndë në gju.
Szczęsny is culer! 💙❤️ pic.twitter.com/B1S3RVBd2L
— FC Barcelona (@FCBarcelona) October 2, 2024
Blaugranët u përballën me një dëmtim të madh muajin e kaluar gjatë ndeshjes së tyre në La Liga kundër Villarrealit. Ndërsa ata mposhtën rehat nëndetësen e verdhë 5:1, kapiteni dhe portieri Ter Stegen u largua nga fusha në lot. Raportet mjekësore më vonë konfirmuan se gjermani kishte një këputje të plotë në tendinën e patellës në gjurin e tij të djathtë.
Në deklaratën zyrtare nga Barcelona thuhej: "FC Barcelona dhe Wojciech Szczęsny kanë arritur një marrëveshje që portieri t'i bashkohet klubit deri më 30 qershor".
Hansi Flick i është rikthyer rrugëve të fitoreve, pasi mposhti 5:0 Young Boys në Ligën e Kampionëve të martën. Ata do të përballen tani me Alaves të dielën në La Liga, me Szczesny që tani do të rivalizojë Inaki Pena për një vend titullari në ekip.
