Steven Gerrard, njeriu që mund ta vendosë garën për titull në Premierligë
Steven Gerrard ia ka siguruar Aston Villës mbijetesën në Premierligë dhe tani mund ta ketë fjalën përfundimtare edhe në pjesën e lartë të tabelës, ku gara për titull po vjen drejt fundit drithërues.
Dy prej ndeshjeve të fundit të Villës janë kundër dy ekipeve të para, duke nisur sot kundër Liverpoolit, i cili është në kërkim të katërpletës historike, dhe pastaj kundër liderit Manchester City më 22 maj, ditën e fundit të sezonit në Premierligë.
Gerrardi ishte pjesë e skuadrës së Liverpoolit i cili ishte vetëm tri ndeshje larg fitimit të titullit në vitin 2014, por rrëshqitja e tij famëkeqe i ndihmoi Chelseat t’i mundë të kuqtë në Anfield dhe ia mundësoi Cityt ta fitojë titullin.
Tetë vite më vonë, kapiteni legjendar i të kuqve mund të ndikojë në përfundimin e garës për titull, e cila do të zgjasë deri në ditën e fundit.
City prin ndaj rivalit Liverpool – me të cilon Gerrardi e fitoi Ligën e Kampionëve, FA Cup, UEFA Cup dhe League Cup dhe i shënoi 186 gola në 710 paraqitje – me tri pikë më shumë kur kanë mbetur vetëm edhe tri ndeshje deri në fund.
Gerrardi e kishte bërë të qartë se nuk ishte i interesuar për një rikthim emocional në Anfield kur Villa humbi 1:0 ndaj Liverpoolit në paraqitjet e tij të pestë si trajner i Villës në dhjetor.
Ai është po aq i interesuar edhe për llafet se Villa mund të luajë rol vendimtar në garën për titull, duke këmbëngulur se është i përqendruar vetëm të fitojë sa më shumë pikë që të jetë mundur.
“Puna ime është t’i fitoj ndeshjet për Aston Villën dhe kështu do të jetë gjithmonë derisa e përfaqësoj këtë klub”, tha Gerrard të hënën.
Gerrardi u emërua trajner i Villës në nëntor, ku ajo ishte vetëm dy pikë larg rënies nga liga.
Por tani Villa synon ta mbyllë sezonin në vendin e 10-të, pas 10 fitoreve në 23 ndeshjet e para të Gerrardit në stol dhe ndeshjen kundër Liverpoolit do ta nisë nga pozita e 11-të.
“Ata [Liverpooli] janë ekip i klasit botëror. Mbase ekipi më i mirë në botë tani”, theksoi Gerrard.
