Rio Ferdinand e mbron Vidicin pas kritikave nga Carragher: Është mit ajo që thoni
Legjenda e Manchester Unitedit, Rio Ferdinand, e ka kundërshtuar pretendimin e Jamie Carragherit se Virgil van Dijk është më i mirë se Nemanja Vidic. Ai i quajti mite ato që ish-ylli i Liverpoolit tha për mbrojtësin serb dhe bëri një krahasim me Marcus Rashford.
Carragher tha për van Dijk se është mbrojtësi më me ndikim në historinë e Premierligës, duke thënë se holandezi tani ka sezonin e vetëm të dobët, ndërsa Rio Ferdinand e John Terry kishin disa të tillë.
Ai gjithashtu pretendoi se Vidic kishte hasur në probleme të mëdha përballë Fernando Torresit, duke thënë se mbrojtësi serb u ndëshkua me të kuq në 2009, duke mos arritur ta ndalë spanjollin në fitoren asokohe të Liverpoolit 4:1 ndaj Manchester Unitedit.
Ferdinand është kundërpërgjigjur në kanalin e tij Vibe me Five: “Unë e pashë atë se çka Jamie ka postuar në twitter, me van Dijk që është më i mirë se Vidic. Unë mendoj se Torres shënoi tre gola në 15 ndeshje kundër Vidicit. Pati momente të këqija, duke parë përjashtimin e 2009, por kjo nuk do të thotë se ai po torturohej nga Torresi. Kjo nuk është kështu, këto gjëra janë mit.”
Ai vazhdoi duke marrë shembullin me Rashford në përballjet kundër Virgil van Dijk.
“Marcus Rashford ka shënuar gjashtë gola në 13 ndeshje kundër Liverpoolit, a do të thotë kjo se ai ka torturuar van Dijkun?”
Pas një sezoni mjaft të mirë për Liverpoolin në sezonin e kaluar ku pretendonin katër tituj, skuadra e Jurgen Klopp ka përjetuar një rënie drastike këtë vit. Aktualisht gjenden në vendin e tetë në ligë me nëntë ndeshje të mbetura deri në fund të sezonit dhe nuk kanë fituar në katër ndeshjet e fundit, që nga fitorja e thellë ndaj Manchester Unitedit me rezultat 7:0 muajin e kaluar.
Mbrojtja e të kuqve ka qenë caku i shumë kritikëve, pasi kanë pësuar aq shumë gola deri më tani, sa në tërësi të sezonit të kaluar, me Van Dijk që u pa fajtor dje në pësimin e golit të parë ndaj Arsenalit.
