Reagimi i Messit kur Aguero i thotë se ekipi i tij i ri ndodhet në fund të tabelës
Sergio Aguero ka zbuluar se Lionel Messi kishte shpërthyer në të qeshura kur i ishte dërguar një fotografi e renditjes së Inter Miamit në fund të tabelës në Konferencën Lindore të MLS-së.
Klubi nga Florida kishte një edicion sfidues më 2023, duke e larguar edhe trajnerin Phil Neville.
Megjithatë, Miami ka arsyeje për të shpresuar tani, pasi shtatë herë fituesi i Topit të Artë Lionel Messi do t’i bashkohet klubit në fund të këtij muaji, pasi t’i mbarojë marrëveshja me Paris Saint-Germain më 30 qershor.
Në Miami do të ketë shumë punë, sepse ai do t’i bashkohet një ekipi i cili i ka fituar vetëm 15 pikë në 16 ndeshje këtë sezon – duke i humbur 11 prej tyre.
Aguero është siguruar që t’ia bëjë me dije menjëherë bashkëvendësit të tij se çfarë e pret në MLS.
“Fola me Messin dje, ia dërgova një mesazh dhe një fotografi të tabelës së Konferencës Lindore dhe i thashë: ‘Ekipi yt është në fund! Duhet ta ngriheni në vendin e 8-të apo 9-të!’” tha Aguero për ESPN.
I pyetur se si reagoi fituesi i Kupës së Botës ndaj atij mesazhi, Aguero tregoi: “Messi shpërtheu në të qeshura dhe tha ‘duhet të futemi në play-off’”.
Shtatë ekipet e para në konferencat e MLS-së shkojnë automatikisht në play-off, derisa ato që përfundojnë në vendet tetë dhe nëntë shkojnë në rrethin Wild-Card.
Inter Miami është momentalisht gjashtë pikë larg këtij vendi me një ndeshje më pak të zhvilluar.
Besohet se Messi do të debutojë për Miamin më 21 korrik kundër Cruz Azul.
