Raphinha: Jemi më të mirë se Real Madridi

Braziliani, Raphinha, ka kontribuar dje në tre gola në ndeshjen e tij të parë për Barcelonën, në fitoren bindëse 6:0 ndaj Inter Miamit. Ai pas ndeshjes tha se janë më të mirë se Real Madridi.

Në ndeshjen e zhvilluar në orët e para të mëngjesit në Florida të Shteteve të Bashkuara të Amerikës, Barcelona e shkatërroi skuadrën vendase, me nga tre gola në dy pjesët e takimit.

Transferet 2022 / Barcelona njofton se ka arritur marrëveshje për yllin brazilian Raphinha

Lojtari i ri i Barcelonës, Raphinha, në këtë ndeshje tregoi se ia vlen çdo cent i dhënë nga 59 milionë eurot për të, duke shënuar një gol dhe dhuruar dy asiste për bashkëlojtarët.

Gjithashtu paraqitje të mirë në fushë në 45 minutat e para kishte edhe Franck Kessie i ardhur si lojtar i lirë, pasi që i përfundoi kontrata me kampionin italian, Milan. Ndërsa Robert Lewandowski nuk u paraqit fare vetëm se stërviti me bashkëlojtarët e rinj.

Gjashtë golat e Barcelonës ndaj Inter Miamit

Barcelonës iu deshën 19 minuta për ta hapur ciklin e shënimeve të golave, ku i pari në listën e shënuesve ishte Pierre-Emerick Aubameyang, ndërsa në pjesën e parë shënuan edhe Raphinha e Ansu Fati.

Në pjesën e dytë, Xavi ndryshoi tërësisht skuadrën, por ishte e njëjta situatë si në pjesën e parë, sërish Barcelona shënoi tre gola. Fillimisht i riu Gavi e pastaj edhe Memphis Depay e Ousmane Dembele për rezultatin final 6:0.

Raphinha paralajmëron Real Madridin

Barcelona më 24 korrik do ta zhvillojë miqësoren e ardhshme, ku do të takohet me Real Madridin, në takimin që njihet si ‘El Clasico’. Kjo ndeshje do të zhvillohet në Las Vegas këtë fundjavë, dhe Raphinha ka treguar që synon të mbajë formën e mirë.

“Unë mundohem të shënojë ndaj çdo skuadre, sidomos kur është një derbi, dua të shënojë gjithsesi. Gjëja më e rëndësishme është fitorja. Për mua jemi më të mirë se Real Madridi. Jam shumë i lumtur që shënova golin tim të parë. Ishte ndeshje e mirë, u mundova të luaja një ndeshje të mirë. Jam shumë i lumtur dhe shpresoj të vazhdojë kështu.”

Lewandowski në stërvitje me skuadrën e re

Të gjithë sytë janë të drejtuar nga polaku, Robert Lewandowski, që prej kalimit të tij nga Bayern Munich te Barcelona. Nënshkrimi i tij u bë zyrtar në mbrëmjen e djeshme. Ai u pa në përgatitje pak para ndeshjes ndaj Inter Miamit, por Xavi vendosi që të mos e përdorë në këtë ndeshje.

Futboll / Trajneri i Bayernit: Barça klubi i vetëm në botë që s’ka para por e merr cilin lojtar që dëshiron, e çuditshme

Kjo do të thotë se Lewa me shumë gjasë debutimin e tij do ta bëjë në El Clasico, e cila do të ishte mundësi e rëndësishme për ish-sulmuesin e Bayern Munichit.