Portieri i PSG-së lëshohet nga spitali, qëndroi për disa muaj qëkur u godit në kokë nga një kalë

Portieri i Paris Saint-Germain, Sergio Rico, do të lirohet nga spitali pas disa muajsh qëndrim, për shkak të një aksidenti që pësoi kur një kalë e goditi në kokë, në shtetin e tij të lindjes gjatë një pushimi që iu dha nga skuadra.

Pothuajse tre muaj më parë portieri u godit nga një kalë i arratisur teksa merrte pjesë në një pelegrinazh në Spanjë. 29-vjeçari u dërgua në spitalin e Seviljes me helikopter dhe u vendos në terapi intensive për shkak të natyrës së rëndë të plagëve të tij, përfshirë kokën.

Siç raportohet nga The Athletic, Rico i është nënshtruar disa operacioneve mjekësore për të trajtuar lëndimet e rënda dhe traumat e trurit që pësoi. Shpresohej që spanjolli do të dilte nga spitali më shpejt, por komplikimet normale e penguan këtë.

Ish-portieri i Sevillas dhe Fulhamit pritet të vazhdojë rehabilitimin në shtëpinë e tij në Sevilla. Rikthimi në futboll nuk është prioritet në këtë fazë, por mjekët nuk e kanë përjashtuar mundësinë që ai të luajë sërish.

Në momentin e aksidentit, familja e Ricos tha: “Sergio Rico udhëtoi mbrëmë nga Strasburgu në Malaga dhe atje në El Rocio, me lejen e klubit pasi PSG fitoi Ligue 1. Pas pak më shumë se një ore e gjysmë me familjen e tij dhe miq, ai ishte duke shkuar për në Meshën Papnore pranë kishës kur pësoi një aksident kur një karrocë mushke dhe një kalë i arratisur e goditën”.

PSG i bëri nderime Ricos në ndeshjen e fundit të Ligue 1 sezonin e kaluar, me emrin e portierit që shfaqej në pjesën e pasme të fanellave të tyre.

Lojtarët e Sevillas kishin veshur fanella me mesazhin: "Hajde Sergio, ne jemi me ty" para fitores së tyre në finalen e Ligën e Evropës ndaj Romës.