Pochettino: Messi duhet ta fitojë Botërorin për t'u bërë më i miri në histori

Ish-trajneri i Paris Saint-Germain, Mauricio Pochettino, beson se Lionel Messi duhet ta udhëheqë Argjentinën drejt triumfit në Kupën e Botës në Katar që ta konfirmojë vetën e tij si më i miri i të gjitha kohërave.

Trajneri argjentinas i pa punë për momentin, është i etur për të parë kombin e tij të triumfojë në Katar me Messin që do të jetë kyç për të provuar shanset.

Futboll / Leo Messi: Argjentina s’duhet të bjerë në kurthin e bujës së madhe që po na bëhet si favoritë

Ai beson se Messi ka nevojë që ta fitojë Kupën e Botës në mënyrë që të provojë madhështinë e tij pranë legjendës së Argjentinës Diego Maradona dhe legjendës së Brazilit, Pele.

I pyetur nëse fitimi i Kupës së Botës ka rëndësi për sa i përket karrierës së Messit në mesin e lojtarëve më të mirë në historinë e futbollit, Pochettino për The Athletic tha: ''Po, ka rëndësi, sepse Kupa e Botës është ndryshe. Ashtu si Maradona apo Pele, duhet të konfirmohesh me ngritjen e trofeut, që është kulmi i futbollit. Kur ngre trofeun, është sikur, 'OK, ai është më i miri në botë'.

Është e vetmja gjë që i mungon Messit, është ngritja e Kupës së Botës dhe shpresoj në Katar që kjo të ndodhë. Sepse unë jam argjentinas, dhe sigurisht dëshira ime është që Argjentina të fitojë Kupën e Botës. Dhe për të konfirmuar Messi vetën si një nga më të mirët, në të njëjtin vend si Maradona dhe Pele."

Katari 2022 do të jetë Kupa e Botës e pestë në karrierën e Messit, dhe ishte Botërori i 2014-ës që ai u afrua shumë afër triumfit pasi luajti në finale me Gjermaninë për të humbur në vazhdime me një gol të vetëm.

Duke u ndalur në krahasimet me heroin e Argjentinës të vitit 1986, Maradona, Pochettino shtoi: "Maradona mund të luante sot dhe Messi gjithashtu mund të luante në të kaluarën. Ashtu si Pele ose [Alfredo] Di Stefano ose [Johan] Cruyff, këta lloj lojtarësh, ata do të përshtateshin në çdo kohë, sepse ata janë kaq, kaq, kaq të zgjuar. Ata mund të përshtaten në çdo periudhë të vetme kohore."

Messi kryeson Argjentinën në ndeshje (165) dhe gola të shënuar (91), i ndjekur nga Javier Mascherano dhe Gabriel Batistuta, respektivisht.

Pas paraqitjes si kapiten të mërkurën kundër Emirateve të Bashkuara Arabe, ku Messi shënoi një gol dhe një asistim, djaloshi nga Rosario do të udhëheqë kombëtaren e tij kundër Arabisë Saudite në ndeshjen hapëse të Grupit C të martën e 22 nëntorit.