Pavarësisht 20 qepjeve, Rudiger do të jetë i gatshëm për El Clasico

Trajneri i Real Madridit, Carlo Ancelotti, ka thënë se Antonio Rudiger është i gatshëm për El Clasico, pavarësisht lëndimit në kokë dhe 20 qepjeve.

Rudigerit i nevojiteshin 20 qepje në ballë pasi u përplas me portierin e Shakhtar Donetsk, Anatoliy Trubin, teksa shënoi golin e barazimit 1-1 të Ligës së Kampionëve të martën, në minutat shtesë të ndeshjes.

Futboll / Chelsea fiton sërish derbin ndaj AC Milanit, Real Madrid në "frymën e fundit" barazon ndaj Shakhtarit

Gjermani, i cili nënshkroi me Real Madridin nga Chelsea në qershor gjatë afatit kalimtar veror, do të mbajë një maskë mbrojtëse për fytyrën.

“Rudiger është një luftëtar”, tha trajneri i mbretërve, Carlo Ancelotti.

“Nëse e shikoni atë, ai është shumë i emocionuar dhe mezi pret ndeshjen e së dielës. Rudiger është stërvitur me maskë, por është mirë. Ai e ka veshur vetëm kështu që plaga të mos hapet më.”

Pasi ka luajtur në çdo ndeshje të ligës deri më tani për Madridin që kur u largua nga Chelsea në verë, 'luftëtari' Rudiger pa dyshim do të jetë i emocionuar për të luajtur në El Clasicon e tij të parë pasi tani është konsideruar i gatshëm për ndeshje.

Ancelotti do të duhet të vendosë nëse i beson apo jo Rudigerit për të filluar një lojë kaq të madhe siç është ndeshja kundër Barcelonës.

Ndërkaq, reprezentuesi belg Courtois nuk do të jetë i gatshëm për përzgjedhje për shkak të disa problemeve gjatë stërvitjeve pas lëndimit të shpinës që e ka mbajtur atë jashtë katër ndeshjeve të fundit të Realit.

“Ai është rikuperuar dhe kjo është e mrekullueshme për ne”, tha Ancelotti. "Por ai ka nevojë për më shumë stërvitje për t'u rikthyer në kulmin e formës. Ne nuk do ta nxitojmë të kthehet derisa të jetë gati."

Real dhe Barcelona janë të barabartë me pikë në krye të Laligës, por Barça është në prag të eliminimit nga Liga e Kampionëve në fazën e grupeve për sezonin e dytë radhazi, pasi ka fituar vetëm një nga katër ndeshjet e tyre në këtë garë.

Futboll / Mbyllet pa fitues drama e gjashtë golave mes Barcelonës e Interit, Bayern Munich kualifikohet tutje

Por Ancelotti thotë se forma e tyre e dobët në Evropë nuk do të ndikojë në lojën në Bernabeu.

“Barcelona ka fituar të gjitha ndeshjet e saj në La Liga, përveç ndeshjes së parë të tyre”, tha ai.

“Ata kanë pasur probleme në Ligën e Kampionëve, por është një garë ndryshe me një këndvështrim tjetër. Në Laliga ata kanë qenë të jashtëzakonshëm.

"Ne do të kënaqemi. Ne duam të fitojmë, por ka ende një rrugë të gjatë për të bërë këtë."