Paraqitja solide me një lojtar më pak nuk mjafton, Gjilani eliminohet nga Liga e Konferencës
Gjilani është bërë skuadra e parë kosovare që është eliminuar nga garat evropiane këtë edicion.
Skuadra e Klodian Duros pësoi humbje në shtëpi me rezultat 0:2, derisa rezultati i përgjithshëm doli të jetë 2:4 në të mirë të Niedercornit nga Luksemburgu.
“Skifterët” zhvilluan paraqitje fantastike duke marrë parasysh se ishin me një lojtar më pak që nga minuta e 14-të.
Mbrojtësi Egzon Sinani bëri një gabim trashanik me një ndërhyrje të panevojshme si lojtar i fundit, me arbitrin që e nuk e fali duke e ndëshkuar direkt me karton të kuq.
Edhe pse me një lojtar më pak, vendasit dominuan plotësisht në pjesën e parë duke pasur edhe dy raste shënimi por që iu mungoi finalizimi.
Sidoqoftë, ishte Niedercorn që arriti të kualifikohet tute falë golit të Mazure-Hanus që pas një asistimi të Mixturit, dribloi mbrojtësin e Gjilanit dhe shënoi lehtësisht përballë portierit vendas (65’).
Pas këtij goli, mysafirët “parkuan autobusin” duke mos lejuar Gjilanin të rrezikojë në minutat e mbetur për ta siguruar ‘biletën’ për në rrethin e dytë kualifikues.
Derisa Gjilani po sulmonte, Niedercorn krijoi një tjetër kundërbzritje të shpejtë me Walid Jarmouni që vulosi fitoren (90+1').
Kësisoj, njësoi si edicionin e kaluar Gjilani nuk arrin të shkojë më shumë se raundi i parë kualifikues në Ligën e Konferencës.
Ndërkohë, tre skuadrat e tjera Ballkani, Drita dhe Dukagjini do t’i vazhdojnë garat në këtë kompeticion.
