Pamje: Dy golat e bukur të Albion Rrahmanit në debutimin e tij me Rapid Bucuresti

Sulmuesi kosovar, Albion Rrahmani, pati debutim ëndrrash me skuadrën e re, Rapid Bucuresti, duke shënuar dy gola, pas inkuadrimit në pjesën e dytë të lojës.

Rrahmani kompletoi transferimin e tij nga Kampioni i Kosovës, Ballkani, për 600 mijë euro, por deri në natën e mbrëmshme nuk e pati mundësinë të debutonte për skuadrën e re, pasi siç njoftuan nga skuadra, atij i mungonte leja e punës në Rumuni.

Futboll / Zyrtare: Albion Rrahmani nënshkruan me Radid Bukureshtin

Rapidi ishte mysafir i Craiovas në javën e shtatë të elitës rumune, ku skuadra e kosovarit dominoi tërësisht takimin.

22-vjeçari hyri në fushë me të filluar pjesa e dytë, kur skuadra e tij po triumfonte me rezultat 3:2, që me golat e tij pastaj fitorja u bë më e sigurt.

Në minutën e 65-të të takimit, Albioni pranoi një top në zonë Funsho Bamgboye, ku shënoi bukur për toke për ta çuar rezultatin në 4:2.

Craiova shënoi me anë të Chitu për ta ngushtuar rezultatin në minutën e 78-të, por Rrahmani doli sërish në skenë për të mos i lënë asgjë rastit. Pas një harkimi nga goditja këndore, sulmuesi i Kombëtares së Kosovës, u shkëput më së larti në shtyllën e parë, për të shënuar për rezultatin përfundimtar 5:3.

Pas një periudhë shumë të suksesshme me Ballkanin, Albion Rrahmani, kështu e nis rrugëtimin e tij të ri në formë fantastike, që premton shumë për të ardhmen e sulmit të Kosovës.