Neymar në kontakt me Barcelonën, ëndërron rikthimin në "Camp Nou"
Barcelona ka zhvilluar bisedime me përfaqësuesit e anësorit të Santos, Neymar, për një rikthim befasues në klub, siç është zbuluar së fundmi.
Neymar u rikthye te klubi i tij i fëmijërisë, Santos, në janar me një kontratë gjashtëmujore pasi ndërpreu marrëveshjen me Al Hilal në Ligën Saudite, me raportet që sugjerojnë se ai dëshiron të përdorë këtë periudhë të shkurtër në Brazil për të dëshmuar se ende mund të luajë në nivelin më të lartë në Evropë.
33-vjeçari ka shënuar dy gola dhe ka dhënë tre asistime në vetëm gjashtë ndeshje për Santos – më shumë gola sesa arriti gjatë periudhës së tij të mbushur me lëndime te Al Hilal.
Sipas një raporti nga The Athletic, prioriteti kryesor i Neymarit është rikthimi te Barcelona, ku ai shkëlqeu për katër vite përkrah Lionel Messit dhe Luis Suarezit në treshen e famshme sulmuese 'MSN', përpara transferimit të tij rekord te Paris Saint-Germain në vitin 2017.
Ky interes nuk është hedhur poshtë nga Barcelona deri më tani, dhe klubi tashmë ka zhvilluar bisedime me përfaqësuesit e Neymarit për një rikthim të mundshëm befasues në "Camp Nou" në fund të sezonit.
Agjenti i Neymarit, Pini Zahavi, këshillon gjithashtu trajnerin Hansi Flick dhe ka një marrëdhënie të afërt me presidentin e Barcelonës, Joan Laporta, duke e bërë komunikimin mes palëve jashtëzakonisht të thjeshtë.
Neymar thuhet se ëndërron të luajë në "Camp Noun" e rindërtuar dhe të dëshmojë veten për të siguruar një vend në kombëtaren braziliane për Kupën e Botës 2026, dy objektivat kryesorë që aktualisht po drejtojnë karrierën e tij.
