“Na falni nëse kemi humbur ndonjë porosi” - Domino’s Pizza tallet me yllin e Liverpoolit
Rrjeti i restoranteve anembanë botës i specializuar në piceri, Domino’s Pizza, me shumë gjasë do të humbë shumë klientë në zonën e Merseyside, pas talljes që ata bënë me yllin e Liverpoolit, Darwin Nunez, ku në një postim kërkuan falje për porositë e humbura, pasi një punëtor i ri ka filluar punën, duke shoqëruar me një foto të uruguaianit.
Nunez ishte sërish emri më i përfolur të hënën mbrëma në futbollin anglez, pasi uruguaiani kishte një tjetër natë të keqe, me të kuqtë që pësuan një disfatë 3:1 në udhëtim nga Brentford.
Opinioni për Nunez mbetet i njëjti që nga transferimi i tij rekord prej 100 milionë eurosh në Anfield në verë, dhe paraqitjet e tij kundër ‘bletëve’ nuk do t'i ketë bërë atij asnjë favor.
Duke e parë atë duke luajtur, është e qartë se Nunez ka gjithçka që mund të dëshironi nga një sulmues i klasit të lartë – ritëm, forcë, gjatësi, lëvizje të mirë – gjithçka përveç përfundimit të rasteve.
Ndonëse nuk ishte asnjëherë larg përfshirjes në lojë, dhe një punëtor i gatshëm për skuadrën, Nunez u ble nga Liverpool për të shënuar gola dhe kjo është pikërisht reparti që po zhgënjen te të kuqtë.
Nunez shpërdoroi disa raste gjatë pjesës së parë në humbjen e skuadrës së tij ndaj Brentford, ndërsa ia doli të shënonte një herë në pjesën e dytë, por goli u anulua për pozitë jashtë loje.
Rastet e humbura ndeshje pas ndeshje, kanë shtyrë njerëzit të reagojnë me shaka, ashtu siç ka bërë edhe piceria ne nam botëror.
Në postimin e bërë nga Domino’s Pizza në Mbretërinë e Bashkuar thuhet: “Na falni nëse kemi humbur ndonjë porosi sot, ne kemi pasur këtë djalin që sapo ka filluar.”
