Moratti kthehet te Interi pas një dekade: Kthim emocional në shtëpi
Ish-presidenti i Interit, Massimo Moratti, është kthyer në qendren stërvitore Apiano Gentile sot, për herë të parë pas 10 viteve, duke e quajtur si: Kthim emocional në shtëpi.
Biznesmeni italian, i cili është kryetar i gjigantëve të energjisë Saras, zotëronte zikaltrit nga viti 1995 deri në 2013, duke sjellë yje të panumërt përfshirë Ronaldon dhe duke shpenzuar ndoshta mbi 1 miliard euro nga financat e tij personale në klub.
Gjatë 18 viteve të Morattit në krye të Interit, ai e udhëhoqi klubin drejt pesë tituje kampioni, katër tituj të Kupës së Italisë, katër tituj të Superkupës së Italisë, Kupën UEFA dhe Ligën e Kampionëve, të cilat erdhën si pjesë e fushatës së tyre historike të fitimit të tripletës nën drejtimin e Jose Mourinhos.
Duke folur me gazetarët e mbledhur në Appiano Gentile përmes Calciomercato.com, Moratti diskutoi fillimisht ftesën e tij në qendrën stërvitore të Interit.
“Për mua është një kthim shumë i bukur, emocional, një gjë shumë e bukur. Faleminderit për ftesën, jam kurioz të shoh se çfarë ka ndryshuar në vitet e fundit.”
Ai foli për luftën e klubit për yllin e dytë në fanellë dhe nëse ky ishte Interi më i mirë ndonjëherë.
“Këtë vit po argëtohemi shumë, ekipi është shumë i fortë dhe gjithashtu luan mirë. Ndoshta (më e mira ndonjëherë) nuk e di, është e vështirë të bësh krahasime edhe për kundërshtarët që takon. Gjithmonë kam thënë se për mua Interi këtë vit ishte super favorit për titull, ata luajnë mirë, janë më të fortë, kanë më shumë qëndrueshmëri, me pak fjalë nuk ka krahasim. Në Ligën e Kampionëve, unë jam më supersticioz, duhet parë ndeshje pas ndeshje”.
Ish-presidenti zikaltër komentoi statusin e yllit Lautaro Martinez.
“Ai është kampion, do të kishte qenë i mrekullueshëm edhe në skuadrën e tripletës. Tashmë e kishim Militon, ai do të duhej ta shtynte! Ai ka klas, të gjithë i përshtaten rolit të tij, ky sistem funksionon në tërësi.”
Moratti foli shumë për trajnerin e Interit, Simone Inzaghi.
“Ai po tregohet se është një trajner shumë i mirë, sinqerisht nuk e kam menduar kështu. Përveçse menaxhon gjithçka mirë, ai e bën ekipin të luajë mirë, është vërtet kënaqësi ta shohësh. Nuk jam i befasuar kur shoh San Siron gjithmonë plot, njerëzit duan të marrin pjesë, është një shpërblim më në fund për cilësinë e lojës. Më pëlqen gjithashtu të shkoj në stadium, Interi është gjithmonë një pasion shumë i fortë për të gjithë familjen time.”
Së fundi, Moratti dha mendimet e tij për presidentin e zikaltërve, Steven Zhang.
“Nuk kam dëgjuar për të kohët e fundit, por ai ishte i kënaqur më parë. Ai është një djalë i ri plot entuziazëm, jam i lumtur për të.”
