Mbappe debuton me gol, Real Madridi triumfon në finale të Superkupës së Evropës ndaj Atalantës

Kylian Mbappe ia ka bërë sefte me Real Madridin. Ai shënoi gol në debutimin e tij në fitoren 2:0, ku Mbretërit triumfuan në finale të Superkupës së Evropës ndaj Atalantës.

Përballja finale u zhvillua në Varshavë të Polonisë, ku u takua fituesi i Ligës së Kampionëve me atë të Ligës së Evropës të sezonit që lamë pas.

Pjesa e parë e takimit ishte shumë e qetë, me të dyja skuadrat të kujdesshme, por që më shumë treguan italianët, madje duke goditur shtyllën në një rast, ndërsa Mbappe në tentimin e parë u bllokua nga mbrojtja e Atalantës.

Gola nuk pati në 45 minutat e parë, ndërsa në pjesën e dytë u shënuan dy.

Real Madridi tregoi krejtësisht fytyrë tjetër në pjesë të dytë, duke krijuar shumë raste shënimi, e Atalanta ishte më pak prezente.

Goli i parë i takimit erdhi në minutën e 59-të, kur Valverde shënoi lehtësisht për 1:0, pasi Vinicius Junior e përfundoi krejt punën me driblime të bukura në zonë.

Mbretërit dyfishuan shpejt rezultatin. Vetëm nëntë minuta më vonë, në një aksion të zgjatur, Jude Bellingham asistoi, teksa Kylian Mbappe shënoi në debutimin e tij për Real Madridin dhe rezultatin përfundimtar 2:0.

⚽️ Goal: Mbappe | Real Madrid 2-0 Atalanta | 🅰️ bellinghampic.twitter.com/68wfzIhIsk

— PushGoals (@PushGoals) August 14, 2024

Ky është një debutim ëndrrash për të, duke shënuar për klubin që e ka ëndërruar që kur ishte fëmijë.

Real Madridi tani bëhet kampion për herë të gjashtë i Superkupës së Evropës, duke kaluar Milanin e Barcelonën që deri më sot ishin të barabartë me nga pesë.