Manchester City e Tottenham Hotspur pa mëshirë ndaj kundërshtarëve, Chelsea mposhtet nga Nottingham Forest

Manchester City e ka mposhtur me rezultat të thellë Fulhamin 5:1, ndërsa edhe Tottenham Hotspur nuk ka treguar mëshirë ndaj Burnleyt duke e mposhtur 5:2, por Chelsea ka pësuar humbje 1:0 nga Nottingham Forest.

Kampioni në fuqi i Premierligës do të vazhdojë edhe pas javës së katërt të mbetet skuadra e vetme që nuk ka humbur pikë, tani duke grumbulluar 12 pikë, me Tottenhamin që ka përcjellin e parë me 10 pikë, pasi ka barazuar në xhiron e parë.

Manchester City – Fulham

‘Qytetarët’ ishin të pandalshëm në Etihad Stadium, duke shënuar plot pesë gola ndaj Fulhamit.

Serinë e golave e hapi sulmuesi argjentinas, Julien Alvarez, që shënoi për 1:0 në minutën e 31-të, pas asistimit të Erling Haaland.

Reagimi ishte i shpejtë i mysafirëve, që vetëm dy minuta më pas realizuan për 1:1 me anë të Tim Ream.

Por për të shkuar qetësisht në pushimin e mespjesëve u përkujdes Nathan Ake në minutat shtesë të pjesës së parë, duke shënuar gol në një moment mjaft të diskutuar, për ta çuar rezultatin në 2:1.

Erling Haaland që fitoi para dy ditësh çmimin si lojtari më i mirë i vitit nga UEFA, erdhi në shprehje në pjesën e dytë me tre gola të shënuar.

Fillimisht për 3:1 shënoi në minutën e 58-të, ndërsa nga penalltia shënoi në minutën e 70-të për rezultatin 4:1.

Het-trikun e tij norvegjezi e kompletoi në minutat shtesë, kur shënoi për rezultatin përfundimtar 5:1.

Burnley – Tottenham Hotspur

Skuadra e porsapromovuar në Premierligë, Burnley, nuk po arrin t’u bëjë ballë kundërshtarëve. Kësaj radhe Tottenham Hotspur nuk ka treguar fare mëshirë ndaj tyre, duke mposhtur me rezultat të thellë 5:1.

Ishin vendasit që kaluan të parët në epërsi, kur shënuan për 1:0 në minutën e katërt me anë të Foster, por kaq ishte se çfarë ata arritën të bënin në këtë pjesë të takimit.

Heung Min-son barazoi në minutën e 16-të për 1:1, ndërsa Romero shënoi në minutat shtesë për epërsinë e parë të Tottenhamit në këtë takim, me të cilin rezultat u mbyll pjesa e parë, pra 2:1.

Në 45 minutat e dyta skuadra e Ange Postecouglut shënoi tre gola të tjerë.

Maddison shënoi të parin gol në pjesën e dytë për Tottenhamin, kur shënoi për 3:1 në minutën e 54-të.

Son kompletoi het-trikun e tij me dy gola të shpejtë. Fillimisht shënoi për 4:1 në minutën e 63-të, ndërsa në të 66-tën shënoi për 5:1.

Burnley realizoi edhe një gol, për ta çuar rezultatin përfundimtar 5:2 me anë të Brownhill.

Chelsea – Nottingham Forest

Chelsea po kalon në një formë të tmerrshme edhe në këtë fillim sezon. Pasi kishte fituar, humbur dhe barazuar një ndeshje në tri takimet e para, sot ka humbur përsëri, tani nga Nottingham Forest.

Loja e skuadrës së Pochettinos la shumë për të dëshiruar, me shumë raste të pakta të krijuara, ndonëse dominuan posedimin e topit, duke e mbajtur mbi 70 % gjatë 90 minutave lojë.

Goli i vetëm i takimit u shënuar me të filluar pjesa e dytë, kur ish-ylli i Manchester Unitedit, Elanga, shënoi për ta çuar në epërsi Nottinghamin.

Me rezultatin 1:0 përfundoi kjo përballje, me Chelsean që mbetet me katër pikë të grumbulluara në katër takime deri më tash.