Kovacic thotë se nën urdhrat e Guardiolas mund të bëhet lojtar edhe më i mirë
Mesfushori kroat, Mateo Kovacic, që u zyrtarizua si lojtar i Manchester Cityt sot, ka treguar arsyen se pse erdhi te kampionët e Premierligës, duke u larguar nga Chelsea pas plot pesë vitesh të kaluara.
Kovacic ka zbuluar se ai ka bërë lëvizjen te City pasi synon të arrijë një nivel tjetër nën urdhrat e Pep Guardiolas. Ai u largua nga Chelsea pas përfundimit të një sezoni të dështuar, duke u renditur në vendin e 12-të në Premierligë, ndërsa City fitoi tripletën në sezonin 2022/23.
29-vjeçari pas nënshkrimit të kontratës tha: “Të bashkohesh me këtë skuadër është vërtet një ëndërr për çdo futbollist. Kam ende shumë për të mësuar dhe për t’u zhvilluar dhe e di që nën drejtimin e Pep mund të bëhem një lojtar më i mirë, gjë që është vërtet emocionuese për mua. Plani im tani është të pushoj për disa javë përpara se të kthehem në Mançester për t'u përgatitur për sezonin e ri. Unë dua ta ndihmoj këtë klub të qëndrojë në krye dhe të fitojë më shumë trofe”.
Reprezentuesi kroat tashmë ka një sërë trofesh të fituara në karrierën e tij, me katër trofe të Ligës së Kampionëve, katër Kupa të Botës për Klube, tre Superkupa të UEFA-s, një trofe në La Ligas, Superkupën e Spanjës dhe Ligën e Evropës, pasi ka luajtur për skuadrën londineze dhe Real Madridin. Ai gjithashtu fitoi tre tituj të ligës kroate me Dinamo Zagreb dhe synon të shtojë numrin e trofeve të tij në stadiumin Etihad.
Kovacic do të shkojë në turneun parasezonal të Cityt në Japoni, i cili fillon me një ndeshje kundër Bayern Munichut muajin e ardhshëm.
