KOK shpërblen me 13 mijë e 500 euro medalistët e Lojërave Mesdhetare “Oran 2022”
Komiteti Olimpik i Kosovës i ka shpërblyer me 13 mijë e 500 euro medalistët e Lojërave Mesdhetare "Oran 2022", që u mbajtën në Algjeri.
Gjatë mbledhjes së sotme, nën urdhrat e Ismet Kransiqit, KOK-u mbajti mbledhjen e 15-të ku u shqyrtuan disa pika të ndryshme.
Këto janë disa vendime prej tyre:
“Pjesëmarrja në Lojërat Mesdhetare Oran 2022 u vlerësua sukses i madh për ekipin tonë, i cili fitoi gjashtë medalje, tri të arta dhe tri të bronzta, me sportet e xhudos (pesë) dhe boksit (një).
U vendos të shpërblehen sportistët që fituan medalje në Lojërat Mesdhetare Oran 2022. Medalistet e arta, xhudistet Distria Krasniqi, Laura Fazliu dhe Loriana Kuka, do të shpërblehen me nga dy mijë euro, ndërsa medalistët e bronztë, boksieri Shpejtim Bajoku dhe xhudistët Akil Gjakova e Flaka Loxha, do të shpërblehen me nga një mijë euro. Trajnerëve do t’u takojë gjysma e shpërblimit të sportistit. Në total, shuma e ndarë është 13500 euro.
U miratua raporti financiar për periudhën TM1
U vendos që anëtari i BE, Bujar Turjaka, të përfaqësojë KOK-un në cilësinë e anëtarit të komisionit për licencimin e federative sportive, komision ky i formuar nga Ministria për Kulturë, Rini e Sport.
Shefi i misionit, Jeton Rudari, raporti për përgatitjet e pjesëmarrjes së ekipit të Kosovës në Festivalin Evropian Veror për të Rinj (EYOF), që prej 24-30 korrik 2022 mbahet në Banska Bistrica të Sllovakisë.
U vendos që xhudistja, Fatjona Kasapi, Shpresë Olimpike 2022, të mbështetet me një mijë euro për mbulimin e shpenzimeve të operimit.
U aprovua kërkesa e Federatës së Karatesë së Kosovës për karateistin Elhami Shabani, i cili rekomandohet në MKRS për marrjen e shpërblimit, pas medaljes së bronztë të fituar në Kampionatin Evropian 2021, të mbajtur në Stamboll të Turqisë”.
Ndërkohë, presidenti Krasniqi disa ditë më parë për Nacionalen dha një intervistë ku pranoi se ishte i kënaqur me medaljet, por kishte pritur edhe tjera nga disa sporte tjera.
