“Karriera ime tashmë është e jashtëzakonshme” – Guardiola beson se nuk ka nevojë për Ligën e Kampionëve që t'ia shtojë madhështinë karrierës
Trajneri i Manchester Cityt, Pep Guardiola, thotë se karriera e tij tashmë është e jashtëzakonshme dhe se koha e tij te qytetarët do të mbahet mend për futbollin e jashtëzakonshëm, jo për numrin e trofeve të fituara.
Trajneri spanjoll beson se gjëja kryesore për të cilën do të mbahet mend skuadra e tij është futbolli mahnitës që ata luajtën, jo nëse e fituan apo jo Ligën e Kampionëve. City është në prag të fitimit të titullit të pestë të Premierligës në shtatë vitet e fundit nën drejtimin e Guardiolës dhe ka një finale të FA Kupës për të zhvilluar kundër Manchester United. Ndeshja e tyre gjysmëfinale e Ligës së Kampionëve me Real Madridin është gjithashtu e balancuar mirë pas barazimit 1:1 të javës së kaluar në Santiago Bernabeu.
“Karriera ime tashmë është e jashtëzakonshme”, tha Guardiola në një konferencë për shtyp para ndeshjes së dytë. "Karriera është e tillë sepse kemi pasur një kohë të vështirë këtu për shumë vite. Dhe koha ime këtu do të mbahet mend nga tifozët se kemi shënuar shumë gola, që kemi pranuar shumë pak dhe se kemi fituar shumë trofe. Në këto vitet e fundit kam pasur një shpërthim. Është si një libër i mirë dhe ndoshta në Evropë njerëzit nuk e kanë vënë re, por këtu kemi kaluar shumë mirë. Kjo është karriera ime."
Pavarësisht se e ka udhëhequr Cityn në dominimin e futbollit anglez në vitet e fundit, në sytë e shumë njerëzve, puna e Guardiolës në Angli nuk do të kryhet derisa ai të mund ta udhëheqë Cityn drejt lavdisë së Ligës së Kampionëve. Skuadra e tij u mund në finalen e vitit 2021 nga Chelsea dhe u eliminua në rrethana të vështira ndaj Real Madridit sezonin e kaluar. Ata gjithashtu u eliminuan nga Monaco, Lyon dhe Tottenham në vitet e mëparshme. Guardiola ka gabuar në vendimet e mëdha në disa raste, si për shembull, të mos luajë me mesfushorë kundër Chelseat dhe të luajë me Eric Garcian pa përvojë në treshen e mbrojtjes kundër Lyonit.
Guardiola bëri shaka për reputacionin e tij për risitë taktike të papritura në ndeshjet e vështira të Ligës së Kampionëve. "Shpresojmë që ju mund të shihni nesër, por nuk do të jetë asgjë e veçantë, nuk jam duke e menduar shumë nesër, mos u shqetësoni djema," shtoi ai. "Asgjë ndryshe nga ajo që kemi bërë, thjesht më shumë të lëvizshëm dhe të luajmë pak më mirë."
Ndeshja e kthimit mes Manchester Cityt dhe Real Madridit zhvillohet nesër me fillim nga ora 21:00 në Etihad Stadium.
