“Ka manipulime” - Gramoz Vokrri për thashethemet se s’është certifikuar në garë për president të FFK-së

Gramoz Vokrri ka thënë për Gazetën Nacionale se nuk është njoftuar nga Federata e Futbollit e Kosovës se kandidatura e tij për president të shtëpisë së futbollit të Kosovës nuk është certifikuar, duke hedhur dyshime se procesi është duke u manipuluar.

Klan Kosova, një medium i afërt me federatën, raportoi se Vokrrit nuk i janë pranuar 15 nënshkrimet e delegatëve që do t’ia siguronin garimin për president të FFK-së.

I pyetur nga Gazeta Nacionale nëse kandidatura e tij është hedhur poshtë, Vokrri tha se nuk e di.

“Nuk e di, askush nuk më ka njoftuar për këtë, por po e shoh nëpër media”, tha Vokrri për Nacionalen.

Ai shtoi: “Po shihet një tendencë për ta manipuluar procesin (e zgjedhjeve). Thuhet është bërë një komision për certifikimin e nënshkrimeve, por pse duhet të ekzistojë ai komision”.

Gramozi - djali i legjendës së futbollit shqiptar dhe ish-presidentit të FFK-së Fadil Vokrri – i kishte dorëzuar 16 nënshkrimet javën e kaluar në zyrën e federatës duke e zyrtarizuar garimin për shef të futbollit vendor.

35-vjeçari madje i kishte bërë publike për media nënshkrimet e delegatëve që ia kishin mundësuar garimin.

Nëse komisioni i FFK-së e hedh poshtë kandidaturën e Vokrrit, atëherë presidenti i tanishëm Agim Ademi do ta ketë plotësisht të hapur rrugën për t’u rizgjedhur president për një mandat të dytë katërvjeçar, duke qenë se nuk do të kishte asnjë kundërshtar.