Juventusi tregohet ‘e pafuqishme’ edhe në Ligë të Evropës, Lazio e mposht skuadrën e Ermal Krasniqit

Juventusi nuk ka arritur më shumë se një barazim si vendas ndaj skuadrës franceze, Nantes me rezultat 1:1 në kuadër të Ligës së Evropës në ndeshjen e parë, ndërsa Lazio arriti fitoren 1:0 ndaj CFR Clujit, pavarësisht se luajti pothuajse tërë ndeshjen me një lojtar më pak.

Zonja e vjetër ndonëse ishte skuadra e vetme që dukej në fushë, nuk arriti të administronte rezultatin e arritur në pjesën e parë, duke pësuar gol në pjesën e dytë në tentimin e parë të Nantesit në drejtim të portës.

Juve kaloi në epërsi në minutën e 13-të të takimit, ku shënoi sulmuesi serb, Dusan Vlahovic, pas një topi shumë të mirë të dërguar nga Federico Chiesa.

Një kundërsulm i minutës së 60-të nga të verdhit, doli të ishte fatal për gjigantin italian. Ishte Ludovic Blas që shënoi me anë të një goditje të fortë për rezultatin 1:1.

Ky rezultat doli të ishte epilogu final i takimit. Të dy skuadrat do të takohen pas një jave, aty ku skuadra fituese kalon tutje në raundin e 1/8 së finales.

Në anën tjetër në Ligën e Konferencës, CFR Cluj e yllit të Kosovës, Ermal Krasniqi, pësoi humbje me rezultat minimal 1:0 ndaj Lazios, edhe pse këta të fundit luajtën për mbi 70 minuta me një lojtar më pak.

Kartoni i kuq direkt i minutës së 13-të i mbrojtësit spanjoll të Lazios, ishte direkt meritë e Ermalit, që bëri një driblim fantastik të katër futbollistëve dhe u ndal nga lojtari i fundit, por kjo diferencë numerike nuk i ndihmoi aspak skuadrës së tij për të bërë diçka më shumë në ndeshje.

Futboll / Pamje: Ermal Krasniqi turpëron serbin e Lazios Savic, e nxjerr me të kuq mbrojtësin Patric

Ishte një gol i Ciro Immobiles i shënuar në minutat shtesë të pjesës së parë, ai që vendosi për fatin e takimit. Deri në fund gola nuk pati dhe Lazio pas një jave udhëton në Rumani me një lehtësi më të madhe.