Jorginho: Koulibaly nuk do ta ndihmojë skuadrën vetëm në fushë por edhe në dhomat e zhveshjes

Mesfushori i Chelseas, Jorginho, ka treguar se pse skuadra e tij ka bërë një lëvizje të jashtëzakonshme me sigurimin e shërbimeve të senegalezit, Kalidou Koulibaly, duke thënë se ai do t’i ndihmojë skuadrës edhe në dhomat e zhveshjes dhe jo vetëm në fushë, pasi që është një njeri shumë i mirë.

Mesfushori i Kombëtares italiane foli për Sky Sport Italia rreth vendimit të skuadrës londineze për t’i paguar 40 milionë euro për të afruar Koulibalyn në Stamford Bridge.

Transferet 2022 / Chelsea përforcon mbrojtjen, zyrtarizon afrimin e Koulibaly

“Mendoj se Koulibaly përfaqëson një nënshkrim shumë, po shumë pozitiv për klubin tonë. Ai nuk është vetëm një lojtar i madh, të gjithë e dimë këtë. Ai do të na ndihmojë edhe në dhomat e zhveshjes dhe jo vetëm në fushë. Ai është një djalë i jashtëzakonshëm”, tha 30-vjeçari para ndeshjes me skuadrën italiane, Udinese.

Ish-mesfushori i Napolit e ka konfirmuar se pati dorë në bisedimet për transferimin e senegalezit, duke i dërguar mesazhe vetë lojtarit ende pa u bërë e qartë dhe definitive marrëveshja.

“I kam dërguar ca mesazhe dhe disa thirrje, duke i thënë eja këtu, për çfarë po pret më? Ne duhet të luajmë së bashku sërish dhe nuk kemi edhe aq shumë kohë të mbetur.”

Futboll / Koulibaly: Jorginho më bindi për t’iu bashkuar Chelseas

Më tutje braziliani i natyralizuar në italian, shtoi se besonte në këtë lëvizje dhe është i lumtur që ka ndodhur,

“Shpresoja shumë që kjo lëvizje do të ndodhte dhe jam shumë i lumtur që ka ndodhur tani.”

Jorginho dhe Koulibaly kanë luajtur më parë bashkë në kampionatin italian, te skuadra e Napolit, për një periudhë katërvjeçare, gjatë viteve 2014-2018, duke u paraqitur si titullarë së bashku në 111 ndeshje, shumë prej tyre nën urdhrat e trajnerit italian, Maurizio Sarri, që tani drejton Lazion.

31-vjeçari ka zhvilluar një ndeshje miqësore me Chelsean deri më tani, dhe atë në humbjen e tmerrshme ndaj Arsenalit me rezultat 4:0.

Debutimi i tij me të kaltrit e Londrës erdhi në çerekun e fundit të lojës, dhe ishte e vetmja gjë pozitive në fushë për Chelsean, pasi që po dërrmoheshin nga skuadra tjetër londineze, Arsenal.