Jordan Henderson pranon propozimin e klubit arab

Mesfushori Jordan Henderson mesa duket do të jetë transferimi më i fundit në Arabinë Saudite, pasi ka pranuar t’i bashkohet Al-Ettifaqit.

Anglezi është bindur nga projekti i skuadrës arabe, që drejtohet nga ish bashkëlojtari Steven Gerrard.

Gazetari italian Fabrizio Romano shkruan se Henderson e ka pranuar propozimin e klubit dhe tani e tërë marrëveshja varet nga dy klubet.

Romano gjithashtu raporton se anglezi ka diskutuar edhe me trajnerin Jurgen Klopp, i cili e ka lejuar të largohet nga “Anfield”.

“Jordan Henderson e ka pranuar propozimin e Al Ettifaq. Ka një marrëveshje verbale në parim. Marrëveshje edhe në aspektin e kontratës”.

“Tani marrëveshja varet nga çmimi që vendoset mes Liverpoolit dhe Al Ettifaq, nuk ka gjasa për ta lejuar të largohet falas. Hendo bisedoi me Kloppin sot dhe ka dritë jeshile”.

Liverpool thuhet se do të kërkojë se paku 10 milionë euro për ta lejuar kapitenin të largohet, me klubin arab që është i përgatitur të ofrojë sa të kërkojë gjiganti anglez.

Henderson ka qenë kyç në mesfushën e Liverpoolit këto vitet e fundit, duke korrur disa suksese përfshirë fitimin e Ligës së Kampionëve dhe Premierligën.

Mirëpo, ai mund të mos jetë futbollisti i fundit që kalon në Arabinë Saudite nga Liverpooli, pasi këtë rrugë pritet ta ndjek edhe bashkëlojtari Fabinho, që ka marrë një ofertë nga Al-Ittihadi.