Ish-ylli i Chelseat pensionohet në moshën 26-vjeçare nga futbolli aktiv
Izzy Brown, i cilësuar nga Jose Mourinho kohë më parë si yll në ardhje për Anglinë dhe Chelsean, i ka dhënë fund karrierës në futboll në moshën 26-vjeçare, për shkak të dy operacioneve që nevojiten pas këputjes së tendinit të Akilit.
Mesfushori me tipare sulmuese ka kaluar tetë vite të tij në klubin londinez, ku është paraqitur vetëm një herë me skuadrën e parë, pastaj për t’u huazuar skuadër pas skuadre.
Në vitin 2014, atëkohë trajneri i Chelseat, Mourinho, për 17-vjeçarin Brown, së bashku me Dominic Solanke dhe Lewis Baker, u tha mediave se janë yjet e ardhshme të Anglisë dhe se duhet të 'fajësojnë vetëm ata' nëse nuk ia dalin.
Brown përfaqësoi Anglinë deri në nivelin U20 dhe ishte pjesë e ekipit U-17 që fitoi Kampionatin Evropian në 2014.
Ai u largua nga Chelsea për në klubin e Championship, Preston North End në qershor të vitit 2021, por pësoi një këputje të Akilit gjatë stërvitjes parasezonale dhe nuk luajti kurrë për ta.
Gjatë ditës së sotme ai ka dhënë lajmin e hidhur në rrjetet sociale, ku tha se lëndimi i tij i pësuar ka kërkuar dy operacione dhe me këtë rast i dha fund karrierës në futbollin aktiv.
“I dashur futboll, me të vërtetë nuk di nga të filloj, megjithëse gjithmonë kam menduar se do të më duhej ta shkruaja këtë një ditë, thjesht nuk e mendoja se kjo ditë do të vinte kaq shpejt”, e filloi letrën e tij, për të vazhduar me falënderime dhe pse erdhi deri te pensionimi në moshën 26-vjeçare.
