Inzaghi i lumtur me fitoren e Interit, nuk brengoset për formën e Lautaros
Trajneri i Interit, Simone Inzaghi, përgëzoi skuadrën e tij për fitoren 2:0 ndaj Comos, duke shtuar se nuk është aspak i shqetësuar me formën e kapitenit, Lautaro Martinez.
Martinez ka hasur në probleme për të arritur formën që e bëri atë lider të golave të ligës sezonin e kaluar dhe nuk ka arritur të shënojë në më shumë se një muaj që kur siguroi një fitore 1:0 ndaj Venezia në fillim të nëntorit.
Megjithatë, Inzaghi mbetet i sigurt në sulmuesin e tij, duke thënë se argjentinasi po luan një rol kyç në orarin e ngjeshur të skuadrës së tij.
“Unë kam qenë sulmues, e di që ndodhin këto momente. Lautaro ishte një nga lojtarët e jashtëzakonshëm kundër Lazios. Sulmuesit po punojnë shumë, ne kërkojmë shumë prej tyre dhe po mundohemi t'i pushojmë sa më shumë në këto rrethana. I thashë Lautaros që të pushojë, sepse ai gjithmonë ka shënuar gola dhe gjithmonë do të shënojë, fati do të kthehet dhe ai duhet të shqetësohet vetëm nëse nuk merr mundësi shënimi”.
Pavarësisht se kampionëve në fuqi u mungonte fuqia sulmuese nga fitorja 6:0 e javës së kaluar ndaj Lazios, Inzaghi theksoi se ekipi i tij e përballoi shumë mirë përballjen ndaj Comos.
"Është e qartë se po ruajmë një nivel shumë të lartë. Të gjitha skuadrat po vrapojnë përpara, ka kundërshtarë si Como që vijnë për të luajtur lojëra të shkëlqyera, por ne luajtëm një lojë të rëndësishme si një ekip i pjekur dhe i vetëdijshëm," u tha italiani gazetarëve.
“E kisha shumë frikë këtë ndeshje, kishim disa dobësi në vijën e pasme. Luajtëm një lojë të përqendruar, në pjesën e parë nuk ishim aq të mprehtë si zakonisht. Më pas në pjesën e dytë rritëm intensitetin dhe goditëm momentet e duhura”.
Golat e Carlos Augusto dhe Marcus Thuram i dhanë Interit fitoren që e mban të tretën me 37 pikë dhe një ndeshje më pak ndaj kryesuesit Atalanta, e cila ka 40 pikë.
