Interi bën hap fals, me një lojtar më pak mposhtet nga Empoli
Pas suksesit që arriti në Arabinë Saudite, ku fitoi Superkupën e Italisë përball Milanit me fitore të thellë, Interi kësaj radhe nuk arriti të tregonte asgjë, kështu duke humbur në shtëpi ndaj Empolit me rezultat 1:0, e gjithashtu për pjesën më të madhe të takimit luajti me një lojtar më pak.
Zikaltrit nuk ishin as afër skuadrës që u paraqit në finale të Superkupës, madje ndaj Empolit vuajti mjaft shumë gjatë tërë takimit.
Mbrojtësi sllovak, Milan Skriniar, i përfolur për një transferim në Paris Saint-Germain, u përkujdes që punët e Interit, të mos ecnin mirë në asnjë mënyrë, pasi që me dy kartonë të verdhë, u përjashtua nga ndeshja qysh në pjesën e parë të takimit.
Diferenca numerike në fushë kreu punën e saj, pasi Empoli arriti të shënonte në pjesën e dytë, që doli të ishte goli i rezultatit përfundimtar.
Ishte Baldanzi që në minutën e 66-të gjeti rrugën deri te goli, pas një goditjeje të fortë, dhe një reagimi jo shumë të mirë nga portieri kamerunas, Andre Onana, për rezultatin 1:0.
Deri në fund, Interi arriti të rrezikonte disa herë, por pa pasur sukses në finalizim.
Kjo për zikaltrit është humbja e gjashtë sezonale, në një sezon që në bazë të skuadrës, thjesht mund të cilësohet si i dështuar dhe tani vetëm mrekullia mund të bëjë që ata të futën sërish në garën për titull.
Interi momentalisht mbanë pozitën e tretë me pikë të barabarta me Romën e vendit të katërt, ndërsa Milani në pozitën e dytë ka një pikë më shumë dhe një ndeshje për të zhvilluar, ndërsa lideri Napoli është plot 13 pikë përpara.