Guerilët thonë se babai i Luis Diaz do të lirohet sa më shpejt të jetë e mundur
Një përfaqësues i guerileve të Ushtrisë Çlirimtare Kombëtare të Kolumbisë (ELN) tha të enjten se grupi do të lirojë babanë e yllit të Liverpool, Luis Díaz, disa ditë pasi e rrëmbyen atë në Kolumbinë veriore, raportoi Reuters.
Qeveria e Kolumbisë tha të enjten se ELN ishte përgjegjëse për rrëmbimin në fundjavë të babait të sulmuesit të kombëtares së Kolumbisë.
Babai i Diaz do të lirohet "sa më shpejt të jetë e mundur", tha përfaqësuesi i ELN Juan Carlos Cuellar në një takim të komunitetit, në një videoklip të ndarë nga ELN me Reuters.
Delegacioni i paqes i qeverisë, i cili aktualisht është në negociata me ELN, tha në një deklaratë të enjten se ishte "zyrtarisht në dijeni" se rrëmbimi ishte "kryer nga një njësi që i përket ELN".
"Ne kërkojmë që ELN të lirojë menjëherë z. Luis Manuel Díaz dhe themi që tani se ata janë plotësisht përgjegjës për të siguruar jetën dhe integritetin e tij," tha Otty Patiño, i cili drejton delegacionin e paqes.
Të dy prindërit e Díaz të Liverpoolit u rrëmbyen nga njerëz të armatosur me motoçikleta të shtunën në një pikë karburanti në qytetin e vogël Barrancas. Nëna e futbollistit, Cilenis Marulanda, u shpëtua brenda pak orësh nga policia që vendosi postblloqe rreth qytetit me 40 mijë banorë, i cili është afër kufirit të Kolumbisë me Venezuelën.
Babai i Diaz mbeti i zhdukur, gjë që nxiti forcat speciale ta kërkonin atë në një varg malesh që shtrihet në të dy vendet dhe është i mbuluar nga pyjet e reve. Policia ofroi gjithashtu një shpërblim prej 48,000 dollarësh për informacionin që të çonte tek babai i Diazit.
