Guardiola: Real Madridi do të kërkojë hakmarrjen
Trajneri i Manchester Cityt, Pep Guardiola, beson se Real Madridi do të jetë e vendosur për të kërkuar hakmarrjen, pasi gjiganti spanjoll u 'shkatërrua' në sezonin e kaluar të Ligës së Kampionëve nga Qytetarët.
Manchester City fitoi 5:1 me rezultat të përgjithshëm në gjysmëfinale të Ligës së Kampionëve sezonin e kaluar, duke i çuar ata më vonë në një triumf të parë në historinë e klubit, kur mposhti Interin në finalen e Stambollit me rezultat 1:0.
Megjithatë, Guardiola nuk ka dyshim se 14-herë fituesit do të jenë një provë e vështirë në ndeshjen e parë çerekfinale të së martës në Madrid.
“Është shumë e vështirë që e njëjta gjë të përsëritet”, tha Guardiola.
"Të mundesh Real Madridin dy herë radhazi është e pamundur. Ata kanë mësuar nga ai takim dhe do të duan të hakmerren. Ata kanë krenari."
Në anën tjetër, trajneri i Real Madridit, Carlo Ancelotti dëshiron që skuadra e tij të tregojë më shumë forcë mendore sesa kur të dy skuadrat u takuan sezonin e kaluar.
Pas barazimit 1:1 në Madrid, Manchester City mposhti Realin në ndeshjen e dytë me rezultat 4:0.
"Ne luajtëm pa guxim, pa personalitet”, tha Ancelotti. “Guximi dhe personaliteti janë thelbësore në këtë lloj ndeshjes, që na munguan në ndeshjen e dytë. E rëndësishme është të jemi në maksimumin tonë, aspekti mendor është shumë i rëndësishëm”.
