Guardiola: Njerëzit dëshirojnë që Haaland të dështojë
Trajneri i Manchester Cityt, Pep Guardiola, ka thënë se njerëzit dëshirojnë që Erling Haaland të dështojë, duke iu përgjigjur kritikëve pas paraqitjes së norvegjezit ndaj Young Boys, ku shënoi dy gola.
Sulmuesi norvegjez kishte kaluar nëpër një periudhë të keqe, pasi nuk kishte gjetur rrjetën në pesë ndeshje të Ligës së Kampionëve përpara se të shënonte dy herë në triumfin 3:1 të Cityt ndaj Young Boys të mërkurën në mbrëmje në Bernë. Megjithatë, në pjesën e parë, ai humbi një shans të artë një kundër një dhe shefi i Cityt ka mbrojtur sulmuesin e tij pas një paraqitje vendimtare.
“Është e rëndësishme të kesh shanse, njerëzit duan që ai të dështojë”, tha Guardiola për TNT Sports pas ndeshjes.
"Më vjen keq, por ky djalë do të shënojë gola gjatë gjithë jetës së tij. Me shanset, ai është një kërcënim i jashtëzakonshëm. Lojtarët kanë nevojë për aftësinë për të gjetur pasimin si Kevin de Bruyne dhe Ilkay Gundogan. Por ai do të shënojë deri në ditën e fundit që ai luan futboll”.
Goditja e Haaland nga pika ishte goli i tij i parë kontinental pas 543 minutash, që kur shënoi kundër Bayern Munichut në ndeshjen e dytë të çerekfinales së edicionit të kaluar. Megjithatë, ai ka shënuar 37 gola në 33 paraqitje në Ligë të Kampionëve.
Haaland është rikthyer në formë në kohën e duhur, pasi City do të bëjë një udhëtim në Old Trafford për të përballur rivalët kryesorë, Manchester United, në derbin e qytetit, që zhvillohet të dielën.
