Guardiola: City i vjetër nuk do të rikthehet këtë sezon

Pep Guardiola ka pranuar se tifozët nuk do ta shohin më "Manchester Cityn e vjetër" këtë sezon, por u zotua se skuadra do të rikthehet në formën më të mirë pas fitores 1:0 ndaj Tottenham Hotspur të mërkurën.

Goli i 20-të i sezonit në Premierligë për Erling Haaland, i shënuar në minutën e 12-të, ishte i mjaftueshëm për të siguruar një fitore që e ngjit Cityn në vendin e katërt.

Kampionët në fuqi shkëlqyen në pjesën e parë dhe duhet ta kishin zgjeruar avantazhin e tyre, pasi Tottenhami e pati të vështirë të përballonte Haalandin, i mbështetur nga Jérémy Doku dhe Savinho në krahë, me Omar Marmoush pas tij.

Tottenham u përmirësua, por City mbajti epërsinë

Spurs u rikthyen më të rrezikshëm pas pushimit dhe, pasi Haaland shënoi një gol që u anulua për prekje të topit me dorë në kohën shtesë, Pape Matar Sarr humbi një mundësi të artë për të barazuar në sekondat e fundit, kur goditi me kokë mbi traversë nga një distancë e afërt.

I pyetur nëse performanca e mirë në pjesën e parë ishte një rikthim i Cityt të vjetër, Guardiola tundi kokën dhe tha:

"Asnjëherë nuk do ta shihni këtë sezon Cityn e vjetër. City i vjetër ishte shumë i mirë. Por ne do të rikthehemi. Kemi një skuadër të re. Sulmuesit tanë janë e ardhmja. Nico [González], kur të kthehet Rodri, do të jetë e ardhmja. Po ashtu edhe Abdukodir Khusanov, Josko [Gvardiol] është ende i ri. Ka shumë fusha ku po rritemi. Bernardo [Silva] dhe disa lojtarë të tjerë janë ende shumë të rëndësishëm për ne, por gjithçka është çështje kohe."

Ai shtoi gjithashtu se Manchester City do të vazhdojë me rinovimin e skuadrës:

"Këtë sezon kemi parë lojtarët e rinj dhe blerjet e reja. Ndoshta klubi do të bëjë disa përforcime gjatë verës, në dritaren e ardhshme të transferimeve, për të udhëhequr këtë ekip për vitet e ardhshme."

Haaland i zhgënjyer me anulimin e golit të dytë

Haaland shprehu zhgënjimin e tij për anulimin e golit të dytë, pasi gjyqtari Jarred Gillett vendosi se ai e kishte prekur topin me dorë – një vendim që u konfirmua pas një kontrolli të gjatë të VAR-it.

"Kjo ndodhi sepse ai [Gillett] e mori vendimin në fushë, që ishte një goditje e lirë," tha Haaland.

"Unë nuk mendoj se ishte prekje e topit me dorë, është qartë një gabim i madh, por ne jemi njerëz dhe bëjmë gabime. Ishte një gol i rëndësishëm, por çfarë mund të bëjmë? Fitorem morëm, kështu që jam i lumtur," përfundoi ylli norvegjez.