FFK dërgon ankesë në UEFA për thirrjet ofenduese ndaj Kosovës në ndeshjet Çeki – Shqipëri, Serbi – Zvicër
Federata e Futbollit të Kosovës (FFK) ka dënuar shfaqjen e banderolave me hartën e Kosovës në flamurin e Serbisë, si dhe thirrjet kundër shqiptarëve në ndeshjet Serbi – Zvicër dhe Çeki – Shqipëri, duke bërë edhe ankesë zyrtare në shtëpinë e futbollit, UEFA.
Tifozët serbë po vazhdojnë me thirrjet kundër Kosovës dhe njëjtë vepruan të shtunën mbrëma, duke bërtitur “Kosova është Serbi” sa herë që mesfushori shqiptar Granit Xhaka e prekte topin.
FFK-ja më në fund ka marrë hapa për këtë situatë, ku ka njoftuar se tashmë kanë dërguar ankesë zyrtare në UEFA.
“Federata e Futbollit të Kosovës dënon ashpër shfaqjen e banderolave me hartën e Kosovës të mbuluar me flamurin serb dhe mbishkrimin “S’ka dorëzim” si dhe thirrjet kundër Kosovës dhe shqiptarëve që u dëgjuan gjatë ndeshjeve të Ligës së Kombeve, Serbi-Zvicër dhe Çeki-Shqipëri.
Këto akte të papranueshme, e të cilat po ndodhin në vazhdimësi nga tifozë serbë dhe tifozë të disa vendeve tjera që janë të afërta me grupet e tilla serbe, nuk kanë vend në futboll dhe në asnjë arenë sportive, pasi përhapin urrejtje dhe përçarje mes popujsh e shtetesh.
Rikujtojmë se incidentet e tilla janë në kundërshtim të plotë me vlerat që UEFA dhe komuniteti ndërkombëtar i futbollit përfaqësojnë. Futbolli duhet të shërbejë si platformë e fuqishme për promovimin e paqes, bashkëjetesës dhe vlerave të barazisë kudo.
FFK, si anëtare e barabartë me federatat e shteteve tjera, ka përgatitur ankesën zyrtare për në UEFA, me dëshmitë e të gjitha shkeljeve e ofendimeve që u bën ndaj shtetit të Kosovës, duke kërkuar që të ndërmerren masa të menjëhershme për të dënuar në mënyrë sa më të ashpër skenat e tilla dhe për të parandaluar përsëritjen e tyre në të ardhmen.
Stadiumet e futbollit duhet të shërbejnë si arena spektakli për tifozët e mirëfilltë e jo si vend për të shpërfaqur irredentizëm, racizëm e ofendime të llojllojshme.
FFK mbetet besnike e promovimit të vlerave, respektit e solidaritetit në sport dhe do të angazhohet në çdo nivel që të sigurojë se këto akte do të dënohen nga mekanizmat e futbollit ndërkombëtar”, thuhet ndër të tjera në komunikatën e tyre.
