“Duhet të shënoj gola” - Grealish e ndien konkurrencën nga Jeremy Doku

Ylli i Manchester Cityt, Jack Grealish, ka thënë se i duhet të shënojë gola, mes konkurrencës nga ardhja e re te ‘Qytetarët’, Jeremy Doku, që ka treguar formë fantastike në ndeshjet e para.

Doku e ka pushtuar futbollin anglez që kur iu bashkua Cityt nga Rennes gjatë afatit kalimtar të verës. Brenda dy muajve, ai ka arritur të luajë në 12 ndeshje për klubin e tij të ri, duke shënuar tre gola dhe duke dhënë gjashtë asistime. Forma e shkëlqyer e belgut e ka vënë pozicionin e Grealish në skuadër nën vëzhgim pasi anglezi nuk ka shënuar ende këtë sezon.

Pavarësisht se asistoi për golin e Phil Foden kundër Young Boys në Ligën e Kampionëve të martën, ylli anglez pranoi se duhet të fillojë të gjejë rrjetën në mënyrë që të fillojë rregullisht për klubin e tij mes konkurrencës nga bashkëlojtari i tij në formë.

Duke folur për TNT Sports, ai tha: "Thjesht mendova ta godisja direkt Fodenit dhe ta lija të shkonte drejt mbrojtësit një për një. Nuk mendoja se ishte një top kaq i mirë, apo jo? Më duhet të filloj të shënoj më shumë gola. Unë e di se çfarë i sjell skuadrës përveç golave dhe asistimeve, por çdo lojtar sulmues dëshiron të shënojë më shumë gola."

Ish-anësori i Anderlecht ishte në formë të nxehtë gjatë fundjavës pasi theu një rekord në Premierligë, duke u bërë lojtari më i ri në historinë e ligës (në moshën 21 vjeç e 161 ditë) që është përfshirë në pesë gola në një ndeshje të vetme, pas golit të tij dhe katër asistimeve në fitoren 6:1 të klubit ndaj Bournemouth.

Skuadra e Pep Guardiolas do të përballet me Chelsean në një përballje vendimtare në Premierligë të dielën, me dy skuadrat që vijnë në formë të mirë në këtë ndeshje.