Drama e gjashtë golave në Stadio Olimpico i takon Interit, nënshtrohet Roma e De Rossit
Drama me gjashtë gola ndërmjet Interit dhe Romës ka përfunduar në të mirë të zikaltërve. Skuadra e Simone Inzaghit pas tre pikëve të plota sot e çon diferencën në shtatë pikë me vendin e dytë Juventusin.
Roma e nisi më mirë takimin, duke pasur më shumë nga loja në minutat e parë, por kjo nuk u konkretizua në gol për asnjë moment, fal edhe portierit Yann Sommer, që në një rast u tregua i mrekullueshëm.
Goli i parë u shënua nga Interi. Ishte një tollovi në zonë pas një rivënie këndore, kur topi u kthye te Francesco Acerbi, i cili me kokë shënoi bukur për 1:0 në minutën e 17-të.
Roma po haste në vështirësi për të krijuar raste shënimi, por një goditje standarde e realizuar nga kapiteni Pellegrini, e gjeti shumë mirë Mancinin, i cili barazoi për 1:1 në minutën e 28-të.
Vendasit arritën ta përmbysin rezultatin deri në fund të pjesës së parë. Zhvillohej minuta e 44-të kur Stephan El Shaarawy pas një kundërsulmi gjeti golin për 2:1, që çoi Romën për herë të parë në epërsi në këtë takim, me të cilin rezultat u mbyll pjesa e parë.
Me të filluar pjesa e dytë, Interi u hodh në sulm dhe në minutën e 49-të Matteo Darmian asistoi për Marcus Thuram, që me lehtësi shënoi për të barazuar në 2:2.
Një përmbysje e rezultatit ndodhi përsëri, por kësaj radhe ishte Interi që realizoi për 3:2, me Angelinon që shënoi autogol pas një presioni të madh nga Thuram.
Deri në fund të takimit u shënua edhe një gol. Ishte Alessandro Bastoni që me asistin e Arnautovic në minutat shtesë e çoi topin në rrjetë për rezultatin 4:2.
Kjo fitore e Interit është e 19-të në këtë sezon nga 23 të mundshme, ku prinë në renditje me 60 pikë, shtatë më shumë se Juventusi dhe 11 më shumë se Milani, që janë ndjekësit më të afërt.
