Dalic vendin e tretë ia dedikon Blazevicit: Kjo fitore shkon për arkitektin e këtyre sukseseve
Kombëtarja e Kroacisë mposhti Marokun 2:1 për të fituar medaljen e bronztë në Botërorin e Katarit 2022 dhe menjëherë pas fitores ka folur trajneri kroat, Zlatko Dalic, i cili këtë sukses ia dedikoi Ciro Blazevicit, që sipas tij është njeriu pas të gjitha sukseseve të kombëtares.
Josko Gvardiol e Mirslav Orsic shënuan për Kroacinë, ndërsa Dari për Marokun në një ndeshje mjaftë interesante për vendin e tretë, me dy skuadrat që ishin befasia e ëmbël e këtij turneu.
Dalic pas ndeshjes tha: “Kjo është medalje e bronztë, por për ne ka një shkëlqim të artë. Këtë fitore do t’ia dedikoja një njeriu që i ka ndërtuar të gjitha këto suksese, ai është Miroslav Blazevic. Shef, kjo është për ju. Ju jeni përgjithmonë trajneri i të gjithë trajnerëve.”
Kujtojmë se legjendari Blazevic tani 87-vjeçar është që një vit në luftë me një sëmundje malinje, ku së fundmi ka folur për gjendjen e tij: “Jam edhe më keq se më parë. Po shkoj drejt fundit, nuk mund të gënjej të them se jam mirë, kur nuk jam.”
Miroslav Blazevic ka pasur një karrierë të gjatë si trajner, ku ka stërvitur shumë skuadra, ndër to edhe Prishtinën. Ai ishte trajner i Kombëtares së Kroacisë për gjashtë vite(1994-2000), por këshillat e tij nuk kanë munguar ndër vite për trajnerët pasues.
