Chelsea fiton bindshëm ndaj Middlesbrough, siguron finalen e Kupës Carabao

Chelsea e ka shkatërruar në përballjen e dytë Middelsbroughin, duke e mposhtur me rezultat 6:1, pasi kishin pësuar humbje minimale në ndeshjen e parë. Kjo fitore ka vlerën e një finaleje të arritur për të kaltrit e Londrës.

Skuadra e Mauricio Pochettinos ishte e pandalshme në këtë ndeshje, duke shënuar katër gola në pjesën e parë dhe dy në 45 minutat e pjesës së dytë.

Goli i parë i takimit erdhi në minutën e 15-të, kur në tentimin e Armando Brojës për të shënuar, Howson aksidentalisht bëri autogol për rezultatin 1:0.

Broja ishte kontribues edhe në golin e dytë, kësaj radhe ai asistoi për Enzo Fernandez, i cili dyshfioi epërsinë në minutën e 29-të.

Në një kundërsulm të shpejtë, i asistuar nga Sterling, Axel Disasi shënoi golin për 3:0 në minutën e 36-të.

Cole Palmer u kujdes që Chelsea ta mbyllte pjesën e parë me katër gola në epërsi, kur shënoi për 4:0 në minutën e 42-të.

Skuadra e Pochettinos nuk u ndal me kaq, ata shënuan edhe dy gola të tjerë, por nuk ia dolën të dalin nga kjo ndeshje pa pësuar gol.

Ishte sërish Palmer, që me golin e tij të dytë personal, e çoi rezultatin në 5:0 në minutën e 77-të, me Conor Gallagher në rolin e asistuesit.

Noni Madueke katër minuta më vonë shënoi për 6:0, Gallagher ishte asistues sërish.

Për rezultatin final, Middelsbrough shënoi golin ngushëllyes, për rezultatin 6:1 me anë të Rogers.

Chelsea me rezultat 6:2, kualifikohet në finale të Kupës Carabao dhe do ta presë fituesin nga ndeshja tjetër Fulham - Liverpool, me të kuqtë që avancojnë nga ndeshja e parë me rezultat 2:1.