Capello: Real Madridi ka nevojë më shumë për Haalandin se Mbappen

Ish-trajneri i Real Madridit, Fabio Capello, ka thënë se 'Mbretërit' kanë nevojë më shumë për sulmuesin e Manchester Cityt, Erling Haaland, se sa atë të Paris Saint-Germain, Kylian Mbappe, ndonëse këtë të fundit e cilëson si futbollist më të mirë.

Real Madridi vazhdon të jetë i lidhur me një lëvizje për superyllin e PSG-së, Mbappe, por francezi nuk ka marrë ende një vendim për të ardhmen e tij . Është raportuar se Real Madrid mund të shkojë për Haaland nëse humbet Mbappen, me ish-bashkëlojtarin e Dortmundit, Jude Bellingham, që thuhet se është në kontakt me yllin e Cityt. Capello thotë se Mbappe është lojtari më i mirë i gjithanshëm, por ka shpjeguar pse Haaland nevojitet më shumë në Santiago Bernabeu.

Italiani për Marca, tha: "Mbappe nuk është qendërsulmues, atij i pëlqen të luajë më shumë në krah. Madridi tashmë ka Vinicius, por Mbappe është Mbappe! Nëse Madridi do të nënshkruajë, ata duhet të pyesin veten nëse kanë një qendërsulmues. Tani. Dhe ata nuk e kanë një të tillë. Ata kanë nevojë më shumë për një sulmues. Por nëse do të shikoni cilësinë teknike, kush është futbollisti më i mirë, Mbappe është mbi Haaland."

Mbretërit kanë mbetur pa një sulmues yll këtë sezon pasi i dha lamtumirën Karim Benzemas. Ish-sulmuesi Joselu është rikthyer në klub në formë huazimi për një sezon, por ka shënuar vetëm pesë gola në La Liga deri më tani këtë sezon. Los Blancos kanë mundësinë për ta bërë marrëveshjen të përhershme, por me siguri do të sillnin një talent të madh si Mbappe ose Haaland për të forcuar skuadrën e tyre në afatin kalimtar të verës.

Los Blancos po presin një vendim për Mbappe. Sulmuesi nuk pritet të vendosë për të ardhmen e tij deri në muajin e ardhshëm. Gjigantët spanjollë tashmë janë përpjekur të nënshkruajnë me Haaland, duke humbur në vitin 2022, por mund të provojnë përsëri veçanërisht pasi e panë atë të fitojë me Cityn tripletën e sezonit të kaluar. Haaland është kontraktuar me Cityzens deri në vitin 2027 dhe raportohet se ka një klauzolë lirimi që mund të aktivizohet nga skuadrat jashtë Premierligës gjatë verës.