“Buzëqesh” Arteta, rikthehen Zinchenko e Partey

Arsenal më shumë gjasë do t’i ketë në dispozicion dyshen Oleksandr Zinchenko dhe Thomas Partey kur të udhëtojnë për përballjen ndaj Sheffield Unitedit të hënën më 4 mars.

Të dy lojtarët i kanë lënë lëndime pas dhe “Evening Standard” raportoi se ishin afër të përfshiheshin ndaj Neëcastle Unitedit vikendin e kaluar.

“Topçinjtë” kanë një javë pushim para se të udhëtojnë për te Sheffieldi, andaj raportohet se është kohë mese e mjaftueshme që ukrainasi dhe lojtari me prejardhje nga Gana të jenë në gjendje për t’iu bashkuar ekipit.

Është bërë një kohë e gjatë që Arsenal ka luajtur pa Partey, i cili ka munguar që nga muaji tetor shkaku i problemit serioz në kofshë. Ndërkohë, Zinchenko s’ka luajtur që nga fillimi i muajit shkurt shkaku i lëndimit që pësoi në fitoren ndaj Liverpoolit.

Edhe pa dy lojtarët, Arseanl ka qenë në formë të mirë duke fituar gjashtë ndeshjet e Premierligës, edhe pse humbën te Porto në ndeshjen e parë të raundit të 16-të në Ligën e Kampionëve.

Arsenal pas udhëtimit ndaj Sheffield Unitedit, do ta presin Brentfordin më 9 mars dhe pastaj kanë përballjen e vështirë ndaj Portos tre ditë më vonë.

Kësisoj, lista e “mungesave” të Arsenait shkurtohet pasi vetëm Takeiro Tomiyasu dhe Jurrien Timber mbesin të lënduar.