Barcelona dënohet nga UEFA për thirrje raciste të tifozëve në Parkun e Princave
Barcelona është gjobitur për thirrje apo sjellje raciste dhe veprime të tjera nga tifozët e tyre në ndeshjen e parë çerekfinale të Ligës së Kampionëve në Parkun e Princave, ndaj Paris Saint-Germain.
Përveç racizmit, UEFA akuzoi gjithashtu Barçën për mbështetësit e tyre që ndezën fishekzjarrë dhe shkaktuan dëme në Parc des Princes.
Klubi spanjoll do të duhet të paguajë një gjobë prej 32,000 euro.
Barca fitoi 3:2 në Paris, por humbi ndeshjen e kthimit të së martës 4:1 në shtëpi për t'u eliminuar nga Liga e Kampionëve.
Përveç gjobës, Barcelonës i është ndaluar t'u shesë bileta tifozëve të tyre për ndeshjen e radhës në një kompeticion të UEFA-s si ndëshkim për sjelljen raciste, megjithëse ndalimi është pezulluar për një periudhë prove prej një viti.
Barcelona duhet të kontaktojë edhe me Paris Saint-Germain, i cili do të takohet me Borussia Dortmundin në gjysmëfinale të Ligës së Kampionëve, brenda 30 ditëve për të shlyer dëmin e shkaktuar nga tifozët në stadium.
