“Askush nuk guxon ta ndjekë penalisht Perezin, Real Madridi i përfshirë në ryshfet me gjyqtarë” – Thotë ish-komisari i policisë, ‘Mbretërit’ reagojnë me komunikatë

Real Madridi i është përgjigjur akuzave për ryshfet me gjyqtarë, nga një ish-komisar policie, i cili kishte thënë se askush nuk guxon ta ndjekë penalisht presidentin e ‘Mbretërve’ Florentino Perez.

Siç raporton The Athletic, Jose Manuel Villarejo kohët e fundit pretendoi se presidenti i Real Madridit pagoi zyrtarët e ndeshjes, në një intervistë shpërthyese me median spanjolle RAC 1.

Sporti / Barcelona nën hetim zyrtar për ‘ryshfet aktiv’ në skandalin Negreira me gjyqtarë

Ish-komisari i policisë i bëri këto pretendime kur diskutoi skandalin e vazhdueshëm në Barcelonë që ka parë klubin të akuzuar për pagesat e supozuara ndaj ish-zëvendëspresidentit të komitetit të gjyqtarëve të futbollit spanjoll, Jose Maria Enriquez Negreira.

Negreira po përballet gjithashtu me akuza për korrupsion së bashku me Sandro Rosell dhe Josep Maria Bartomeu, të cilët të dy ishin president të Barcelonës gjatë tetë viteve të fundit të mandatit të shefit të gjyqtarëve midis viteve 2010 dhe 2018.

Barca gjithmonë ka mohuar çdo keqbërje, por Villarejo pretendon se Reali është angazhuar në praktika të ngjashme, pasi ai tha për RAC 1: "Të gjithë presidentët e kanë bërë këtë. Florentino Perez gjithashtu. Disi, në Real Madrid, para këtij (rasti Negreira) ishte bërë e njëjta gjë, tashmë ishte zbuluar. Është e pamundur të ndiqet penalisht çdo gjë që përfshin Perez. Do të ishte vetëvrasje për këdo që guxon ta bëjë këtë. Florentino është i paprekshëm."

Real Madridi ka lëshuar një deklaratë zyrtare duke iu përgjigjur akuzave, duke konfirmuar se Perez tashmë ka nisur procedurat ligjore kundër Villarejo për "akuzat e rreme".

Në deklaratën e plotë thuhet: “Presidenti i Real Madrid CF, Florentino Perez, ka urdhëruar ngritjen e menjëhershme të padisë përkatëse ligjore kundër ish-komisarit Villarejo për akuzat e rreme të bëra në radiostacionin katalanas RAC1”.

Villarejo u arrestua me akuza për ryshfet dhe zhvatje në vitin 2017 dhe doli në gjyq katër vjet më vonë.

Real Madrid aktualisht po përgatitet për ndeshjen e fazës së grupeve të Ligës së Kampionëve me Napolin, e cila do të zhvillohet në stadiumin Diego Armando Maradona të martën mbrëma.