Arteta e konfirmon se Merino do t'i mungojë Arsenalit disa javë

Mikel Merino ka përjetuar një fillim aspak të mirë te Arsenali, pasi pas transferimit të tij të bujshëm, ai është dëmtuar dhe pritet të mungojë disa javë, siç ka konfirmuar trajneri, Mikel Arteta.

Reprezentuesi spanjoll, i cili e ndihmoi vendin e tij për lavdinë kontinentale në Euro 2024, kishte shpresuar të dilte në terren në Emirates Stadium këtë fundjavë. Mikel Arteta kishte këmbëngulur për ta transferuar spanjollin si një opsion tjetër për mesfushën të mbushur me yje në veri të Londrës.

Sidoqoftë, Merino do ta shohë debutimin e tij në Premierligë për Topçinjtë me vonesë. 28-vjeçari është lënduar gjatë stërvitjeve, me mbrojtësin brazilian Gabriel Magalhaes të përfshirë në një përplasje me shokun e tij të ri të skuadrës.

Arteta u ka thënë gazetarëve se Merino nuk do të jetë i përfshirë në planet e tij të menjëhershme: “Është për të ardhur keq. Ai ka një dëmtim në shpatull dhe duket se do të mungojë për disa javë. Ai ra në tokë dhe Gabi u ul sipër tij, ndoshta është një frakturë.”

Arsenali që shpreson për titull, me gjashtë pikë të marra nga dy ndeshje në sezonin 2024-25, do të luajë si mikpritës ndaj Brighton të shtunën. Merino nuk do të përfshihet në atë ndeshje, dhe ende nuk është përcaktuar se kur do të jetë i gatshëm për të nisur eksperiencën e tij të re në Angli.