Arrestohen tre persona për thirrje raciste ndaj dy yjeve të Barcelonës

Policia e Spanjës ka arrestuar tre persona në lidhje me thirrjet raciste ndaj yjeve të Barcelonës, Lamine Yamal dhe Raphinha, gjatë El Clasicos së fundit në Santiago Bernabeu.

Yamal dhe Raphinha ishin të dy në objektiv në fitoren 4:0 të Barçës ndaj Real Madridit, kur në fund të ndeshjes, ata morën keqtrajtime nga tifozët në stadium.

“Tre arrestime janë bërë për fyerje raciste të drejtuara ndaj dy futbollistëve gjatë El Clasicos së tetorit”, konfirmoi policia në rrjetet sociale të shtunën.

“Të arrestuarit bënë thirrje ksenofobike që cenonin dinjitetin dhe integritetin moral të të dy lojtarëve”.

Hetimi nisi pasi LaLiga raportoi ngjarjen në polici.

“Arrestimet pasojnë një ankesë të paraqitur nga LaLiga, e cila ofroi regjistrime të incidenteve dhe një raport nga një ekspert i leximit të buzëve në polici”, tha liga në një deklaratë të shtunën.

“Në La Liga, ne vazhdojmë të luftojmë për t’i dhënë fund racizmit brenda dhe jashtë futbollit”.

Lufta e La Ligas kundër racizmit ka qenë gjithnjë e më shumë në qendër të vëmendjes pas abuzimit të përsëritur të Vinícius Júnior në stadiumet në të gjithë vendin.

Duke folur në fillim të kësaj jave, sulmuesi i Real Madrid tha se ai "ka vuajtur shumë dhe ende vuan " për shkak të racizmit që i është nënshtruar që kur mbërriti në vend në 2018.

Megjithatë, ai shtoi se është bërë progres në muajt e fundit, duke identifikuar gjithnjë e më shumë autorët.

Në qershor, tre tifozë të Valencias u burgosën me tetë muaj për abuzim racor ndaj Vinícius gjatë një ndeshjeje në La Liga në maj 2023, në verdiktin e parë të këtij lloji në Spanjë.

Në shtator, një gjykatë spanjolle i dha një dënim me kusht 12 muajsh një mbështetësi të Mallorcas që përdori fyerje raciste kundër Vinícius dhe Samuel Chukwueze të Villarrealit në shkurt 2023.

Muajin e kaluar, policia kombëtare e Spanjës arrestoi katër persona përgjegjës për një fushatë urrejtjeje kundër brazilianit.

Presidenti i La Ligas, Javier Tebas, ka bërë thirrje për dënime me burg për tifozët që abuzojnë racialisht lojtarët gjatë ndeshjeve, duke i thënë ESPN në shtator se liga do ta çojë luftën deri në fund.

Vinícius ishte ndër të parët që dënoi fyerjet raciste ndaj lojtarëve të Barcelonës nga tifozët gjatë El Clasicos pas ndeshjes.

"Ajo që ndodhi ishte e tmerrshme dhe nuk ka vend për këta kriminelë në shoqërinë tonë," tha ai. “E di që Madridi dhe policia do të veprojnë për të identifikuar dhe dënuar fajtorët”.

Nuk është rasti i parë i racizmit që përfshin gjithashtu sulmuesin e Barçës, Yamal, i cili është shfaqur si një nga lojtarët kryesorë të ekipit që nga debutimi i tij si 15-vjeçar në 2023.

Në fillim të këtij viti, eksperti i Movistar, Germán "Mono" Burgos u shkarkua për një koment racist që ai bëri për adoleshentin para ndeshjes së Barçës në Ligën e Kampionëve kundër Paris Saint-Germain.