Arne Slot: Vështirë të refuzohet Liverpooli

Trajneri i ardhshëm i Liverpoolit, Arne Slot, ka thënë se mundësia për ta drejtuar një klub të madh ishte vështirë të refuzohej, duke konfirmuar sërish se do të jetë në krye të skuadrës nga Merseyside.

Të kuqtë ranë dakord për një marrëveshje kompensimi me vlerë 9.4 milionë funte me Feyenoord në prill pasi 45-vjeçari u identifikua si njeriu i duhur për të pasuar Jurgen Klopp në Anfield.

Klopp, i cili kishte qenë përgjegjës për Liverpoolin që nga tetori 2015, u largua nga klubi në fundjavë me përfundimin e sezonit, ku në ndeshjen mbyllëse fituan kundër Wolves.

Pas lojës, 56-vjeçari gjerman u bëri thirrje tifozëve të Liverpoolit të këndojnë së bashku me të emrin e ri të trajnerit: "Arne Slot, na na na na na na".

Kontrata tre-vjeçare e Slot në Liverpool do të fillojë zyrtarisht më 1 qershor, duke iu nënshtruar një leje pune.

"Sigurisht nuk është një vendim i lehtë për të mbyllur derën pas jush në një klub ku keni përjetuar kaq shumë momente të mrekullueshme dhe keni punuar me sukses me kaq shumë njerëz të mrekullueshëm," Slot i tha faqes zyrtare të klubit të Feyenoord.

"Por si sportist, një mundësi për t'u bërë trajner në Premierligë, në një nga klubet më të mëdha në botë, është e vështirë të refuzohet."