Arne Slot: Liverpooli në bisedime të vazhdueshme me Salah, Van Dijk e TAA
Trajneri i Liverpoolit, Arne Slot, ka thënë se 'The Reds' janë në bisedime të vazhdueshme me Mohamed Salah, Virgil van Dijk dhe Trent Alexander-Arnold, pasi pasiguria rreth të ardhmes së tyre afatgjate me klubin vazhdon.
Të tre lojtarëve u skadon kontrata në fund të sezonit dhe për këtë arsye do të jenë të lirë të fillojnë negociatat me klubet jashtë shtetit nga 1 janari.
Slot ka mbetur kryesisht i heshtur për këtë çështje, por tani ka këmbëngulur se ai nuk shqetësohet nga ngërçi i kontratës, me ekipin e tij aktualisht shtatë pikë epërsi në krye të tabelës së Premierligës me një lojë më pak.
"Nëse do ta bënim, atëherë ndoshta nuk është momenti për t'ju thënë tani," tha Slot kur u pyet nëse ai kishte një përditësim mbi negociatat në një konferencë shtypi përpara përballjes së Liverpool me West Ham.
“Në përgjithësi, këtu nuk flas për situata kontratash. Do të ishte çudi që unë isha ai që do të njoftoja se njërit prej tyre i është zgjatur kontrata. Është e qartë se nga 1 janari, ndoshta për ju djema, gjërat ndryshojnë shumë, por ata janë në bisedime të vazhdueshme me klubin dhe le të presim dhe të shohim se çfarë do të ndodhë. Për sa kohë që ata vazhdojnë të performojnë kështu, trajneri është i lumtur."
Slot lëshoi gjithashtu një përditësim mbi gjendjen fizike të dyshes së lënduar Ibrahima Konaté dhe Conor Bradley, të cilët të dy kanë mbetur jashtë fushës që nga fitorja e Liverpool ndaj Real Madridit në nëntor.
“Ata nuk do të kthehen për West Ham United”, tha trajneri i Liverpool. “Pastaj ka një javë ndërmjet ndeshjes së West Ham dhe Manchester United. Të shohim sa afër janë atëherë. Është e vështirë t'ju them në këtë moment sepse nuk stërviten ende me grupin. Shpresojmë që në ditët në vijim t'i afrohen asaj situate. Por përsëri, Ibou ka qenë jashtë për pesë apo gjashtë javë ndoshta, Conor po aq kohë dhe ata janë në konkurrencë me lojtarë që janë plotësisht në formë dhe po bëjnë shumë mirë, kështu që unë duhet të bëj gjykimin e duhur në momentin që ata kthehen”.
