Anthony Gordon pas triumfit ndaj Arsenalit: Duhet të qëndrojmë të përulur

Anësori i Newcastle United, Anthony Gordon, u ka bërë thirrje bashkëlojtarëve të tij që të "qëndrojnë të përulur" pasi mposhtën Arsenalin me rezultat të përgjithshëm 4:0 në gjysmëfinalen e Carabaos.

Gordon shënoi golin e dytë në fitoren 2:0 të së mërkurës në ndeshjen e kthimit në St James’ Park.

“Është e rëndësishme për ne që të qëndrojmë të përulur tani”, tha Gordon për Sky Sports. “Finalja do të jetë një moment i madh, por është ende shumë larg. Ndihem i mahnitur. Ishte një paraqitje fantastike ekipore dhe ne morëm fitoren.”

Goli i Gordonit në pjesën e dytë erdhi pas një presioni të ashpër, ku qendërmbrojtësi Fabian Schär i rrëmbeu topin Declan Rices në buzë të zonës së penalltisë së Arsenalit pas një gabimi të portierit David Raya.

“Tifozët tanë janë gjithmonë fantastikë, ata e bëjnë shumë të vështirë për kundërshtarët dhe ne e zbatuam planin në mënyrën e duhur”, shtoi Gordon. “Ne kishim një plan loje që besuam se do të funksiononte. Të gjithë e dinë që ne ushtrojmë presion të lartë.”

Trajneri Eddie Howe diskutoi gjithashtu qasjen agresive të ekipit pas fitores.

“Ne donim t’u bënim presion William Salibas dhe Gabrielit dhe për ta arritur këtë, duhej të pozicionoheshim në zonat e duhura dhe të ushtronim presion të lartë — kështu vendosëm ta luanim ndeshjen,” tha ai për Sky Sports.

“Ne po luanim kundër lojtarëve të elitës dhe një gabim i vogël mund të na penalizonte. Duhej të qëndronim besnikë ndaj stilit tonë dhe të ishim të guximshëm.”

Sfida e radhës për ekipin e Howe është një udhëtim në Birmingham City të shtunën, në kuadër të Kupës FA.