Ancelotti: Vinicius Junior është lojtari më i persekutuar në histori të futbollit
Trajneri i Real Madridit, Carlo Ancelotti, ka 'sulmuar' kritikët e Vinicius Junior dhe ka thënë se ylli i Mbretërve është lojtari më i persekutuar në histori të futbollit.
Braziliani u kritikua për shtyrjen e Will Orban të RB Leipzig në dy raste të njëpasnjëshme në 1/8 e finales së Ligës së Kampionëve, diçka për të cilën ai u ndëshkua. Sulmuesi u fishkëllua vazhdimisht nga mbështetësit e Valencias në barazimin 2:2 të Real Madridit fundjavën e kaluar - nëntë muaj pas abuzimit racor nga tifozët në Mestalla sezonin e kaluar. Tani, trajneri i Mbretërve, Ancelotti e ka mbështetur prerazi 23-vjeçarin.
Ai u tha gazetarëve të premten: "Kam parë pak prapa, në histori, në statistika, dhe nuk kam parë kurrë një lojtar që është persekutuar si Vinícius. Ai është goditur, ai është fishkëllyer, ai është fyer. Dhe çfarë bën ai? Ai shënon gola dhe jep asistime. Dhe pastaj duhet të flas me të për qëndrimin e tij? Jo! Të gjithë duhet të ndryshojnë qëndrimin e tyre për Vinicius. Në historinë time personale, një lojtar me talent të madh nuk ka vuajtur kurrë gjërat që ka vuajtur Vinicius. Në Vallecas [kundër Rayo Vallecano] ai mori goditje karate në kokë, dhe nuk pati as një karton të verdhë. Tani të gjithë kërkojnë një karton të kuq për shtyrjen kundër Leipzig."
Përveç kritikave dhe abuzimeve që merr, Vinicius ka vazhduar të performojë në fushë për gjigantët spanjollë. Në 26 ndeshje, ai ka shënuar 15 gola dhe ka dhënë shtatë asistime dhe do të vazhdojë të jetë vendimtar në atë që pritet të jenë një sezon me trofe për Real Madridin.
Reprezentuesi brazilian ka të ngjarë të jetë në veprim për liderët e La Ligës, Real Madrid, kur ata të përballen me Celta Vigo të dielën në mbrëmje, duke kërkuar të zgjerojë diferencën e tyre në krye të tabelës me Barcelonën e vendit të dytë në tetë pikë.
