Amrabat për debutimin e tij te Manchester Unitedi: Kam punuar tërë jetën time për këtë natë

Ylli maroken, Sofyan Amrabat, është shprehur tejet i kënaqur me debutimin e tij te Manchester Unitedi ndaj Crystal Palaces, duke thënë se ka punuar tërë jetën e tij për këtë moment.

Marokenit iu desh të priste më shumë se tre javë për të bërë debutimin e tij pas kalimit të huazimit nga Fiorentina, pasi mbërriti me një dëmtim të shpinës. Pasi kaloi disa minuta nga stoli në fitoren ndaj Burnleyt të shtunën, mesfushori bëri fillimin e tij të parë për Unitedin në një fitore të theksuar 3:0 ndaj Crystal Palaces në Kupën Carabao.

"Mendoj se ishte një natë e përsosur. Që kur isha fëmijë, punova për këtë, gjithë karrierën time, gjithë jetën time," tha Amrabat për Sky Sports. “Është e martë dhe i gjithë stadiumi është plot, fantastike”.

Amrabat filloi në krahun e majtë pasi Sergio Reguilon ishte i padisponueshëm, por luajti në të gjithë fushën dhe tha se ishte i lumtur të luante kudo që Ten Hag kishte nevojë për të. "I thashë trajnerit se luaj ku të duhet, edhe si portier, kudo që mund të ndihmoj skuadrën. Sot isha mbrojtës i majtë edhe pse luajta më shumë në mesfushë", shtoi ai. “Nuk jam ende në maksimumin tim, është normale që nuk pata një parasezon perfekt, pata një lëndim, u stërvita aq shumë për dy javë të vështira, por në fund të ditës ju duhen ndeshje”.

Amrabat pranoi se ai nuk i ishte bashkuar klubit në një moment ideal duke pasur parasysh problemet e shumta të United brenda dhe jashtë fushës. “Nuk ishte koha më e lehtë, është e qartë se United është një klub i madh, është e qartë që duhet të fitosh, trajneri më tha se presioni është i lartë, çdo ditë duhet të fitosh kështu që ne të ecim përpara”, shtoi ai.

Djajtë e Kuq përballen sërish me Crystal Palace të shtunën, kësaj radhe në Premierligë.